Etxearen ordainetan komunitate-lanak eta beste hainbat neurri

Atalak: Gizartea

Etxe kaleratzeei, etxebizitza hutsei (255.000 baino gehiago Euskal Herrian), espekulazioari… aurre egiteko neurri eraginkorrak har daitezkeela frogatu du Andaluzian Elena Cortés Etxebizitza kontseilariaren taldeak, Euskal Herrirako balio dezaketen neurriak.

Hiru hilabetetan 39 familiaren kaleratzea saihestu dute Andaluzian, urritik martxan den legeari esker.

– Langabezian geratu direla-eta alokairu soziala ordaindu ezin dutela frogatzen dutenek lan komunitarioak eginez kitatu ditzakete zorrak. Alegia, alokairu konpentsatua delako proiektu pilotua jarri dute martxan Andaluziako hainbat probintziatan, eta etxebizitzaren eta eremu komunen konponketa lanetan aritzearen truke etxean jarraitu ahal izango du ordaintzeko adina dirurik ez duenak. Hego Euskal Herrian, %4 inguru baino ez da alokairu soziala eta Iparraldean, legeak dio etxeen %20 bideratu behar dela etxebizitza sozialetara, 20.000 biztanle baino gehiagoko herrietan. Etxebizitza sozial horiek, dena den, salmentakoak nahiz alokairukoak izan daitezke. Europako herrialde askotan, ohikoa da etxebizitzen %50 baino gehiago alokairuan izatea, eta alokairua arautua dagoenez, prezioak ez daude merkatuaren menpe (jabetza bezain garesti), hemen gertatzen den bezala.

– Etxe hutsen aurkako neurrien artean, bankuak eta eraikuntza-enpresak zigortzen ditu Andaluziako Etxebizitza legeak. EAEn aldiz, etxe hutsak bultzatzen ditu legeak berak, eraikitzen diren etxe berrien %10 hutsik geratuko direla aurreikusten baitu Lurralde Antolamenduak.

– Etxe-kaleratzeei aurre egiteko, behin-behineko desjabetzearen bidez (alegia, administrazioak etxebizitza bere gain hartzearen bidez) hiru hilabetetan 39 familiaren kaleratzea saihestu dute Andaluzian, urritik martxan den legeari esker.

– Etxebizitzen efizientzia energetikoa bultzatzeko (funtsezkoa dena besteak beste pobrezia energetikoa saihesteko; hots, jendea hotzak egon ez dadin ezin duelako berogailua ordaindu) 3,7 milioi euroko proiektua abiatuko dute Andaluzian. Gipuzkoako Aldundiak kalkulatu du urtero 40 heriotza goiztiar eragiten dituela pobrezia energetikoak lurralde honetan.

– Ondasun higiezinen gaineko zergekin jokatzeko eskatu die Elena Cortések Andaluziako udalei, alokairua sustatzen dutenei hobariak eskainiz. Euskal Herrian, oro har zergen kenkariak onuragarriagoak dira etxearen jabe izanez gero, alokairuan egonda baino.

Alternatibak badaudela erakusten ari da Cortésen saila, baina hainbati ez zaionez interesatzen alternatibak egotea, Andaluziako Etxebizitzaren Funtzio Soziala bermatzeko Neurrien Legeari helegitea jarri dio Espainiako Gobernuak. “Helegiteak aitortu ezin diren arrazoiak ditu atzean, tartean elite finantzarioaren eta etxe-espekulatzaileen alde egitea, krisiaren biktimak zigortuz, langabetuak, abal-emaileak, autonomoak, prekarioak eta pentsionistak –kritikatu du Cortések–. Helegitea jartzea krudelkeria eta koldarkeria hutsa da”.

Euskal Herriko egoeraz eta konponbideez sakonago: Alokairu publiko soziala sustatzeko premia.