LOMCE, akuilu paregabea

Atalak: Hezkuntza

Gauza bat ezin diogu ukatu Wert ministro espainolak datorren ikasturterako abiatu nahi duen hezkuntza erreformari: benetako ezten eta pizgarria izan da, Euskal Herriak hezkuntza sistema propioa behar duela konturatzeko eta eredu burujabearen bide horretan ekimen eraikitzaileak ugaritzeko.

LOMCEren kontrako indar metaketa, nahi dugun eredua eraikitzeko baliatu behar dela jabetu dira asko. Irudian, Hezkuntza Plataformen Topagunea.

LOMCEren kontrako aldarri gisa jaio zenak herritar gero eta gehiago eta hezkuntza komunitateko eragile guztiak edo ia guztiak mobilizatzea lortu ostean, urratsak eman ditu aspaldi honetan: inposaketa horren aurka agertzea izan da abiapuntua, bidea boikota eta desobedientzia dela argi du ikas-komunitateak –instituzioek ez hainbeste–, eta areago, LOMCEren kontrako indar metaketa nahi dugun eredua eraikitzeko baliatu behar dela jabetu dira asko.

Sarri, zartakoa behar da lozorrotik esnatzeko, oraindik egiteko dagoenaz hausnartzeko. Eusko Jaurlaritzak EAErako Heziberri 2020 euskal curriculuma proposatzea ekarri du LOMCEk, eta nahi dugun irakaskuntza motaz eta honek izango duen marko legalaz gogoeta bultzatu du –ikastetxeetako, tokian tokiko eta Euskal Herri mailako– hezkuntza komunitatean. Ildo horretan, interesgarria da aste honetan bertan Bilbon aurkeztu duten Hezkuntza Plataformen Topagunea: bertako kide eta guraso Miren Larrionek Info7 irratian zioen moduan, unea aprobetxatu behar da, daukaguna irauli eta gure hezkuntza ereduari ekiteko. Zeregin horretan, funtsezkoa izango da eragile guztien elkarlana eta adostasuna; alegia, Topagunearen hitzetan, etorkizuna “modu kolektiboan garatzea, gaur LOMCErik Gabeko Herria dena, izan dadin etorkizunean Hezkuntza Sistema Propiodun Herria”.