Zeinek garbitzen du hobeto arropa, emazteak ala amaginarrebak?

Atalak: Gizartea

Rouco Varela gustura uzteko moduko familia eredu matxista, ustel eta atzerakoia islatzen dute Ariel detergente ezagunaren Twitter kontuko (32.200 jarraitzaile) mezuek. Tuiterlarien erantzun haserretuei entzungor, bereari eutsi dio Arielek… orain arte.

“Ez dugu baloraziorik egin nahi emakumearen rolari buruz”, adierazi du Arielek.

Leire Narbaizaren txioak eraman nau garbigarriaren Hego Amerikako kontura. “Zeinek garbitzen du hobeto, emazteak ala amaginarrebak?”, “Etxeko lanetan laguntzen duen senarrak gol ederra sartzen du!”, “Maitasuna, kariñoa eta Ariel: familia akasgabe mantentzeko errezeta perfektua”,  “Kontatu amatxori garbitzeko orduan eguna errazagoa eta koloretsuagoa egingo dioten produktuak daudela”, “Zure senarrak asteburuan futbolean jokatzen badu, badakizu batzuetan denbora gehigarria garbigailuan dela…”. Horiek, aurki daitezkeen ale bakan batzuk (ikusi irudiak behean).

Jende ugarik erantzun ditu mezuok, gehienetan ironiko eta salatzaile. “Senarrak lagundu? Zeinen eskuzabala, gizona”, “Arielen formula zuen matxismoaren mende berekoa al da?”, “Eta eramaiozu garagardo bat senarrari, sukaldera bueltatu aurretik”, “Erdi Aroan bazeuden detergenteak dagoeneko? Zeren mezu hau ordukoa da, ezta?”, “Baina zeinek egiten dizkizue zuei publizitate kanpainak, Cañetek?”, “Arropako orbanak baino, hobe zenukete zuen publizitateko matxismoa garbitu”.

Facebooken, gizonek ere garbitu dezaketela adierazi dio erabiltzaile batek detergente markari, eta honela erantzun dio Arielek: “Sentitzen dugu komentatzen duzun moduan interpretatu izana. Gure nahia publikoarengana era pertsonalagoan gerturatzea da, ez dugu baloraziorik egin nahi emakumearen rolari buruz”. Eskerrak!

Erantzun oldearen presioak eraginda agian, honako mezua utzi berri du Twitter-en Arielek: “Ados gaude arropa garbitzea denen lana dela. Uste dugu taldean lan eginez dena errazagoa dela =)”. Jendearentzat, ordea –erantzunei erreparatuta–, sinesgarritasun guztia galdu du Arielek.

Erantzun oldeak eraginda, estrategia aldatu ote du Arielek?: