Irun errepublikarra

Atalak: Politika

Batzuk III. Errepublika aldarri, beste batzuek Euskal Herri independente eta errepublikarra helburu, astelehenean alderdi ezberdinek (EH-Bildu, Ezker Anitza, Gazte Komunistak, EPK eta Podemos) bat egin zuten Irunen, oinarri berak batuta: monarkia behin betiko kentzea.

“Klase oligarkikoen pribilegioak mantentzen dituen sistema politikoa dugu, eta berau bermatzen duena Estatuaren buruzagitza monarkikoa da (instituzio matxista, anakronikoa eta atzerakoia)”. (Argazkia: Nicolas Guerendiain elkartea)

Tradizio errepublikarra duen hirian, jende ugari bildu zuen manifestazioak, Euskal Herriak erabaki, Monarkiarik ez, Erreferenduma orain edo Monarkia kanpora! gisako leloak eskuetan. Alderdi guztiek onartu zuten ekitaldi amaieran Nicolas Guerendiain Irungo Errepublikarrak taldeak irakurritako adierazpena: “Despotismoa, gainbehera eta ustelkeria” bizi dituen monarkiaren irudia garbitzeko helburuz, “Estatuaren buruzagitza ordezkatzea, itxuraldaketa ariketa bat besterik ez da. Arazoaren funtsa ez da erregea nor izango den, baizik eta interes orokorrari bizkar emanez, klase oligarkikoen pribilegioak mantentzen dituen sistema politikoa dugula, eta berau bermatzen duena Estatuaren buruzagitza monarkikoa dela (instituzio matxista, anakronikoa eta atzerakoia)”.

Gogoratu zutenez, “kasta politikoaren onarpenarekin eta Estatuko herrialdeen borondatea errespetatu gabe Franco diktadore kriminal eta genozidak hautatu zuen Estatu ereduari jarraipena eman nahi zaio”.

Gainera, “ez gara fio herritarrak adingabekotzat jotzen gaituzten politikariez, Estatuaren ereduari buruz erabakitzeko dugun gaitasuna murrizten dutenak, demokrazia hitza uneoro ezpainetan baina gai garrantsitsuei buruz herriak berak erabakitzea eragozten dutenak”.

Benetako demokrazia eta erreferendumaren beharra aldarrikatu zuten, herri galdeketak denon ahotan dauden garaiotan.

Irun hirigunea zeharkatu zuen manifestazioak. (Arg: Nicolas Guerendiain elkartea)