Abortatzeko eskubidearen alde 30.000 lagun bildu zituen mobilizazioaren dokumentala

Atalak: Gizartea

Espainiako Estatuan inoiz egin den manifestazio feminista jendetsuena mobilizatu zen Madrilen, joan den otsailaren 1ean. Estatu osoko 30.000 lagun baino gehiago elkartu ziren, abortatzeko eskubidea murriztu nahi duen lege-erreformaren aurka. Dokumentala aurkeztu dute orain.

http://vimeo.com/99974636

Yo decido. El tren de la libertad (Nik erabakitzen dut. Askatasunaren trena) du izena dokumental kolektiboak eta lege-erreformaren kontrako protesta itzela du ardatz. Manifestazioaren ideia Asturiasko talde feminista batean jaio zen, espontaneoki, amorrua eta aldarrikapen nahia nola bideratu eztabaidatzen ari zirela. Madrilera joango ziren, herri eta lurralde ezberdinetatik, trenez, askatasunaren trenean, “askatasuna delako gure aldarria, emakumeon askatasuna gure gorputzarekiko, emakumeon askatasuna gure osotasun fisiko eta moralari eragiten dioten erabakiak hartzeko”, dio dokumentalean taldekideetako batek.

Ez ukitu nire uteroa gero!

Amsterdam, Buenos Aires, Erroma, Paris… Espainiako Estatuko herritar eta emakumeei babesa emateko nazioartean egindako elkarretaratzeak ikusiko ditugu dokumentalean. Duela urte mordoxka bat Espainiatik abortatzera joaten zirenak nola artatzen zituzten azaltzen du Edinburgoko bizilagun batek. “Ezin dut sinetsi gauza bera aldarrikatzen egotea hogei urte geroago, tamalgarria da”. “Ikaragarria da gizonek erlijioa baino ez hartzea kontuan. Ez al die lotsarik ematen gu Erdi Arora bidaltzeak? Ez dute inongo aitzakiarik emakumeon askatasuna arriskuan jartzeko. Ez ukitu nire uteroa gero! Sabelen greba orokorra! Emakumeak boterera!”, oihukatzen du emakume batek Bruselan.

Jarraian, abortatzeko eskubidearen alde egin diren hainbat ekimen bildu dituzte lanean: emakumeak euren gorputza ondasun higiezin gisa erregistratzen, performancea tren batean, komisarian norbere burua errunduntzat aurkezten abortista izateagatik…

Eta manifestazioaren egun handiari heltzen dio dokumentalak. Pankartaz eta kamiseta morez betetako trenak, Madrilera bidean. Manifestazioko irudiek ongi irudikatzen dute egun hartako festa eta aldarri giroa. Tartean, manifestariei eurei jarriko die mikrofonoa lanak, euren erreibindikazio, esperientzia eta bizipenei (garai bateko abortu klandestinoei buruzkoak, beldurgarriak).

“Ez dugu nahi adin txikikoak bagina bezala tratatzen gaituen legerik”

“Gallardón faxista hutsa!”, “ez ukitu gure obarioak!”, “ministro jauna, ez gaituzu garaituko!”… Askotariko lelo eta oihuak entzun ziren manifestazioan. “Leku eta herrialde guztietako, adin guztietako emakumeak gaude hemen, eta indar eta elkartasun honek ez du mugarik. Adin txikikoak bagina bezala tratatzen gaituen eta atzerakoia den lege hori geldituko dugu, ez dugulako nahi. Ez dugu nahi!”, dio manifestari batek.

“Abortatzeak ez du zerikusirik ideologiarekin, ezta une historikoarekin ere. Beti gertatu da, kontua da zein baldintzatan ematen den erraza ez den erabaki hori”, beste batek.

“Badirudi emakumeak haurdun geratzen garela gero abortatzeko. Ez dut uste abortatzeak aztarna ezabaezina uzten dizunik, baina erabaki erraza ere ez da”.

“Hipokrita hutsak dira, beraiek egiten duten guztia gainontzekook ez dezagula egin inposatu nahi dutelako”.

Gizonek ere hartzen dute parte manifestazioan, jakina. “Manifestazio honetan nago erabakitzeko eskubidearen alde, arrotza zaigun moral bat inposatu ez diezaguten, eta emakumeenganako errespetuagatik”.

Begoña Piñero Les Comandes talde feministako buruaren hitzaldiak emango dio amaiera manifestazioari : “Emakumeak ere lehen mailako herritarrak gara. Badakigu erabakitzen, noiz, non eta norekin nahi dugun ama izan, ez dugu haiek esaterik behar, ez dugu behar Elizak eta eskuin-muturrak gidatzerik”.

Eta amaieran, abortatzeko eskubidearen aldeko aspaldiko argazkiak.

Iruñean ikusgai

Emakume zinegileen elkarteko 60 lagunek baino gehiagok lagundu dute 42 minutuko dokumental honetan eta sarean ikusgai egoteaz gain, leku ugaritan ari dira proiektatzen. Joan den astean Irungo Kabigorri ateneoan eman zuten eta hilaren 23an, Iruñeko Golem zinemetan erakutsiko dute.