Euskaraz errodaturiko film bat lehiatuko da lehen aldiz Zinemaldiko Sail Ofizialean

Atalak: Zinema, Zinemaldia 2014

Jon Garaño eta Jose Mari Goenagaren Loreak izango da goitik behera euskaraz grabaturiko lehenengo pelikula Sail Ofizialean lehiatuko dena. Ke arteko egunak (Antxon Ezeiza, 1990) zen orain arte Donostiako Zinemaldian Urrezko Maskorraren lehian parte hartu duen euskarazko film bakarra, baina protagonista mexikarra izanik bikoiztu egin zuten pelikularako.

“Euskaraz egindako film bat nazioarteko beste filmekin parez pare lehiatu daitekeela” erakutsiko du, diote Garañok eta Goenagak.

Zuzendariek pozarren hartu dute berria. “Filma askoz ikusgarriagoa egin daiteke. Jende gehiagok ikusi dezake eta horren bidez oihartzun handiagoa lortu. Komunikabideek eta industriak ere arreta gehiago eskaintzen diote Sail Ofizialean dauden filmei, ikusmin handiagoa sortzen da eta saltzaile, banatzaile eta beste zinemaldien interesa erakartzen da”, diote. “Kritikatuagoak ere izan gaitezke, Sail Ofizialeko filmekin askotan ez dago gupidarik eta horrek beldur pixka bat ematen digu, baina arriskuak arrisku, nahiago dugu Zinemaldiko Sail Ofizialean egon beste sail batean baino”.

Euskarazko zinemarentzat garrantzitsua

Filmari oihartzuna emango dio nazioartean –mundu guztitik etorritako kritikariek ikusi eta baloratuko dute–, eta ondorioz, baita euskal zinemagintzari ere. Bertako lanaren erakusgarri izango da eta “euskaraz egindako film bat nazioarteko beste filmekin parez pare lehiatu daitekeela” erakutsiko du, zuzendariek azpimarratu dutenez. Horregatik, “euskaraz eginiko zinemarentzako garrantzitsua izan daitekeela iruditzen zaigu, eta espero dezagun etortzekoak diren beste filmen artean lehena izatea eta ez salbuespena”.

80 egunean, aurrekaria

80 egunean da Garaño eta Goenagaren aurreko pelikula. Kritika eta publikoaren harrera ona izan zuen eta hura ere euskal zinemaren erakusgarri izan zen hein handi batean, Euskal Herrian baino jende gehiagok ikusi baitzuen hemendik kanpo. “Hemengo jendeak hemengo zinema egiteko beharra dago, askotan esaten baitigute, ‘euskaraz egin behar duzue? Baina horrek asko mugatzen du distribuzioa!’. Beraiek ez dute ulertzen pelikula horiek guk egiten ez baditugu, ez dituela beste inork egingo”, esan ziguten Garañok eta Goenagak elkarrizketa batean.

Talde lana, Moriartiren oinarria

Garaño eta Goenaga kide dituen Moriarti ekoiztetxearentzat ere berri pozgarria da. Azken finean, talde lanean oinarritzen da Lucio edo Arrieta metodoa bezalako lanak ekoitzi dituen produktora. Elkarlana dute abiapuntu eta horregatik ez da harritzekoa bi zuzendariren artean gidatzea filma. “Azkenean, Moriartiko proiektu guztiak oso gureak sentitzen ditugu; egon edo ez egon zuzendari, gidoilari edo ekoizle moduan, denek interes eta helburu bera jarraitzen dugu. Elkarri laguntzen diogu, eta formula magikorik ez izan arren, niri behintzat ziurtasun bat ematen dit”, adierazi ziguten elkarrizketa hartan.

Istorio intimista da Loreak

Istorio intimista da azken lana, suspentsearekin eta ezustekoekin jolasten duena, eta horrexegatik ez dute gehiegi aurreratu nahi. Sinopsiak honakoa dio: “Aneren bizimodua goitik behera aldatuko da astero-astero etxean lore-sorta bat jasotzen hasten denean. Beti ordu berdinean. Beti modu anonimoan. Lore misteriotsu batzuek aldatu egingo dituzte Lourdesen eta Tereren bizimoduak ere. Ezezagun batek lore-sorta bat utziko du astero, eurentzat hain garrantzitsua izandako norbaiten oroimenez. Hiru emakumeren istorioa da hau; hiruren bizimoduak goitik behera aldatuko dira lore-sorta xume batzuen eraginez. Lore horiek ahaztutzat zituzten sentimenduak azaleratuko dituzte… Baina azken batean, loreak baino ez dira”.

“Kritikatuagoak ere izan gaitezke, Sail Ofizialeko filmekin askotan ez dago gupidarik eta horrek beldur pixka bat ematen digu”. (Arg: Dani Blanco)

Zinemaldiko antolatzaileek orain arte jakinarazi dutenez, Pablo Maloren Lasa eta Zabala filmak ere Sail Ofizialean hartuko du parte, baina lehiaketatik kanpo emango dute.