Galdu ezin dituzun bost film, eta trailerrak

Atalak: Zinema, Zinemaldia 2014

Zinemaldia potente dator aurten, adituek diote, eta Euskal Herriko produkzio garrantzitsuak daude tartean, Loreak (ikusi trailerra), Lasa eta Zabala (ikusi trailerra) eta Negoziatzailea, adibidez. Batzuk, kritikak eta ikusleek aurretik laudaturiko pelikulak dira, dagoeneko arrakastaren bermea daramatenak. Hona horietako bost proposamen interesgarri.

Boyhood

Boyhood

Urteko pelikuletako bat da. Richard Linklater zuzendari estatubatuarra 2002an hasi zen Boyhood errodatzen, eta 12 urte iraun du filmaketak, protagonistaren benetako eboluzioa pantailan harrapatzea lortu duelarik (mutiko bat 2002an, nerabe eta gazte, azkenerako). Esperientzia intimista eta epikoa dela diote ikusi dutenek, eta ia 3 orduko filma den arren, amen batean ikusten dela. Familia, harremanak eta haztearen prozesua kontatzen digu filmak, beti ere mutiko-nerabe-gazte protagonistaren begiradatik. Nazioarteko kritikariek bozkatzen duten Fipresci saria irabazi du pelikulak.

Jauja

Lisandro Alonso argentinarraren lanak ere hitz onak baino ez ditu jaso. Aberastasuna eta zoriona bilatzen zuten lehenengo konkistatzaileen garaira garamatza filmak, pampa argentinarrean. Danimarkatik Argentinara bidaiatu duten aita-alabak aurkeztuko dizkigu Alonsok; alabak soldatu gazte batekin ihes egin ondoren, haren bila abiatuko da aita. Errealismoa, mitologia eta kutsu fantastikoa uztartzen dituen lan honetan, alabaren bila abentura bakartia abiatzen duen protagonistak bere beldurrei eta bere buruari egin beharko die aurre. Viggo Mortensen aktoreak antzeztu du pertsonaia nagusia eta pelikulak kritikarien saria irabazi du aurten, Canneseko Un Certain Regard sailean.

The Tribe

Thriller gordina da The tribe ukraniarra (jatorrizkoan, Plemya). Inoiz ez bezala, pelikulako aktore guztiak gormutuak dira, eta zeinu bidez aritzen dira euren artean. Hau da, pauso hots eta kolpeetatik harago, ikusleak ez du ezer entzungo, ahotsik ez, behintzat. Nerabe gormutuz beteriko barnetegian, munduak bazter utziriko txoko ilunean, oihanaren legea da nagusi: mafia, biolentzia, sexua, mendekua, isolamendua… gupidarik gabe landu ditu Myroslav Slaboshpytskiy zuzendariak, kritiken arabera. Hain zuzen, Canneseko Kritikaren Astea irabazi du aurten filmak.

Corn Island

Simindis Kundzuli du jatorrizko titulua, Artoaren Irla, alegia. Artoa landatzeko asmoz uharte txiki batean etxola eraiki eta bertara bizitzera joango dira gizon zahar bat eta haren biloba. Uhartea, ordea, Georgia eta Abkhaziaren artean dago, eta gerran daude bi lurraldeok, Abkhaziak independentzia lortu nahi duelako. Baina ingurutik etengabe pasatzen diren soldadu georgiarrak baino arriskutsuagoa da, hainbatetan, natura bera. Sakona, estetikoki indartsua, lirikoa… dira jaso dituen laudorioetako batzuk. George Ovashvili georgiarraren filmak sari nagusia lortu du Karlovy Varyko zinema jaialdian.

Matar a un hombre

Mendekua. Hori da Alejandro Fernández Almendras txiletarrak zuzenduriko pelikularen ardatza. Jorgeri semea hilko dio lapur batek, eta espetxean denbora bat igaro ostean aske geratzen denean, berriz ere aurrez aurre aurkituko dira hildakoaren aita eta hiltzailea. Tentsioa mantenduz, bortizkeriaz, amorruaz, inpotentziaz… mintzo da zuzendaria, Sundance eta Rotterdam jaialdietan saritu duten pelikula honetan.