Marotoren gezurrak agerian

Atalak: Gizartea

Javier Maroto Gasteizko alkatearen “kanpaina xenofobo, arrazista eta klasista” deseraikitzen duen txosten mamitsua kaleratu du Gasteizko Alde Zaharreko La gente rula kolektiboak.

Sei urteren ondoren Dirusarrerak Bermatzeko Errenta jasotzen jarraitzen duten kanpotarren kopurua %7koa da, eta bertakoen artean, %43koa.

“Etorkinak gizarte laguntzetatik bizitzera datoz”, dio Marotok, eta horrek “erakarri” egiten ditu kanpotarrak. EAEn, ordea, 2012an baino kanpotar gutxiago zenbatu zituzten 2013an (3.730 inguru gutxiago) eta Ikuspegi Immigrazioaren Euskal Behatokiaren arabera, krisiak eraginda EAEtik alde egiten dutenen %85 kanpotarrak dira. Inguruarekin konparatuta (Espainiako Estatua), askoz txikiagoa da EAEra datozen migratzaileen kopurua, lan aldetik ez zaielako erakargarri (eraikuntza, ostalaritza, nekazaritza… gutxiago dago-eta gurean). Halaber, Dirusarrerak Bermatzeko Errenta (DBE) jasotzeko, aurreko hiru urteetan jarraian EAEn erroldatuta egotea eta etxebizitza izatea beharrezkoa da, edo urtebetez erroldatuta egotea baldin eta gutxienez bost urtez lan egin badugu. Beraz, ezinezkoa da iritsi eta de facto laguntzak jasotzen hastea, baldintza jakinak bete behar dira-eta.

“Gizarte laguntzetan egiten den iruzurra eskandalagarria da”, dio Marotok, eta ez da Gasteizko udal laguntzez ari, iruzurrik egon ez dadin Udalean neurriak hartu dituztela gaineratu baitu. Beraz, Eusko Jaurlaritzak eta zehazki Lanbidek kudeatzen dituen laguntzez (DBE) ari da. Lanbideren ikerketen arabera, baina, laguntza horietan egin den iruzurra %1ekoa da.

“Aljeriar eta magrebtar gehienak gizarte laguntzetatik bizi dira Gasteizen”, dio Marotok. Aldiz, txostenak nabarmendu duenez Lanbideren datuek argi uzten dute DBE kobratzen dutenen gehiengo handia “bertakoa” dela. Laguntza jasotzen dutenen %60,7 euskal herritarrak edo Espainiako Estatukoak dira (39.780), eta %9,3 magrebtarrak (6.114). Areago, migratzaileen artean Hego Amerikako jendea da prestazio gehien jasotzen duena (8.780 lagun), ez aljeriarra edo magrebtarra. Kontuak kontu, Juan Ibarretxe Lanbideko Enplegurako eta Dirusarrerak Bermatzeko Prestakuntzaren zuzendariaren hitzak gogoratuz, “jatorrietatik harago, sistemaren baitan dauden pertsonak hartzen dira kontuan, eta legez dagokie laguntza kobratzea”.

Dirusarrerak Bermatzeko Errenta jasotzen bizitza guztia eman dezakezula eta etorkinek hori egiten dutela iradoki du Marotok. Baina errenta horrek baldintzak ditu, tartean Lanbidek eskainitako lanpostua ez ukatzea, ongi arrazoituriko argudiorik ez badago. Gainera, Arartekok egindako ikerketan oinarrituz, sei urteren ondoren diru-laguntza hori jasotzen jarraitzen duten kanpotarren kopurua %7koa da, eta bertakoen artean berriz, %43koa.

Diru-laguntza horiek etorkinei eman beharrak bertakoak laguntzarik gabe uzten dituela iradoki du Marotok. Beste behin, datu bidez gezurtatu egin dute txostenean: Gasteizen kasuan, zehazki, bertakoak dira errenta jasotzen dutenen gehiengoa, eta kopurua goraka doa. Gainera, “eskubide subjektiboa” da DBE; alegia, baldintzak betetzen dituenari legez ordaindu behar dio errenta administrazioak, eta hortaz, denei erantzuteko handitu egingo da diru poltsa, behar izanez gero.

Zergatik ari da gezurretan Gasteizko alkatea?

“Gasteiztartasun zaharkituenaren ordezkari” izatea egotzi dio Alde Zaharreko kolektiboak Marotori eta bi arrazoi nagusi aipatu dituzte horretarako: gaiaz hitz egiten jardun dezagun denok, “PPren funts-desbideratzeez eta alkateak bete ez dituen promesez hitz egin beharrean”. Eta “edozein gizarteko sentimendurik berekoienak azaleratzen dituen kalan botoak arrantzatu nahi dituelako, ‘gu, hemengoon’ eta ‘besteak, hemengoak ez direnen’ artean harresiak eraikiz”. Ikuspegiren azken datuen arabera, hain juxtu, migratzaileenganako jarrerak okerrera egin du gizartean, lan eta ekonomia arloei lotuta.

Ellacuria gizarte fundazioko zuzendari Martin Iribarrik oso bestela ikusten ditu gauzak, txostenean jaso dutenez: “Krisi garaian administrazioa egiten ari den kudeaketak askoz gehiago ahultzen ditu gizartean dagoeneko ahulenak diren taldeak, hein batean Atzerritarrentzako Legeak betebeharrez zamatzen dituelako eta eskubideak murrizten dizkielako”. Argi du baita ere Rosabel Argotek, Euskadiko Errefuxiatuen Laguntzarako Batzordeko kideak: “Krisia benetan eragin dutenei errua bota ezin diegunez, immigranteei botatzen diegu errua”.