Esperantzara kondenatuak

Atalak: Zinema, Zinemaldia 2014

Inpultsoak kontrolatzeko zailtasunak dituen eta biolento jartzen den nerabea, arazo ekonomikoek eta semea menderatu ezinak itota duten ama, eta arrazoi ezkutuek hitz-totel bihurtu duten bizilaguna. Koktel indartsua aurkeztu digu Xavier Dolan zuzendari kanadarrak, Mommy filmean.

Bai, pelikularen une ugaritan badirudi bideoklip batean gaudela, pop abesti arrakastatsuen erritmora; bai, artifizioa atsegin du Dolanek, planoetan, estetikan, efektismora ailegatuz, zenbaitetan. Eta bai, esango nuke Arreta Galera eta Hiperaktibitate Nahasmendua duen protagonistaz ematen den irudiak hiperaktibo bat baino gehiago (eta guraso bat baino gehiago) haserretuko dituela. Baina horiek barkatuz gero, ongi kontaturiko melodrama da Mommy, umore gordin eta politikoki ez zuzena darabilena, pertsonaia potenteak dituena, amaiera ilunera kondenatuta dagoen arren bizitzaz beteriko istorioa dakarkiguna.

Arreta Galera eta Hiperaktibitate Nahasmendua du Steven gazteak eta sarri ez da erraza berarekin bizitzea. Aita hilda dago eta amak ahal duena egiten du etxera dirua eramateko. Halako batean, “urte sabatikoa” hartu duen bizilagun berezia egokituko zaie pareko etxean, eta Stevenentzako primerako irakaslea izango da denboraldi batez, ama-semearen bizitzetara itxaropen printza bat ekarriz. Azken finean, errealitate gordinaren aurrean itxaropena baino ez zaie geratzen. Cannesko zinemaldian, Epaimahaiaren Sari Berezia lortu zuen filmak.

ZABALTEGI PERLAK

Mommy

Zuzendaria eta gidoilaria: Xavier Dolan.

Aktoreak: Anne Dorval, Suzanne Clément, Antoine Olivier Pilon.

Kanada, 134 minutu.