Harrapatuta

Atalak: Zinema, Zinemaldia 2014

Karabana xumean, mundutik at, arazoetatik at, zoriontsuak dira Laila eta Aaron, Catch me daddy filmeko protagonistak. Apenas duten dirurik, eta ezkutuan bizi dira, iraganetik ihesi. Baina hala ere, zoriontsu dira, elkar maite dutelako, barre egiten dutelako elkarrekin, eta ez dutelako gehiago behar. Zoriontsu… atzean utzi nahi duten iraganak aurkitzen dituen arte.

Lailaren aita pakistandarrak agindua eta dirua eman baitu, alaba etxera bueltatu dezaten. Orduantxe hasiko da bikotearen gaurik luzeena, harrapari nekaezinengandik ihesi. Eta gau amaigabe horretan, eskutik eramango gaitu zuzendariak, protagonisten oinazea, itolarria eta estutasuna gure eginez. Ehiztariaren eta harrapakinaren jokoan, denak balio du, helburua lortzeko. Ez dago mugarik, eta mugetatik harago eramango gaitu zuzendariak ere, tentsioa mantenduz.

Gordina, iluna, indartsua da Daniel Wolfe-n pelikula, gordina eta iluna delako erakusten digun mundua, erakusten dizkigun pertsonaiak eta giroak. Eta jakina, gordin, ilun eta indartsu denak ezinbestean harrapatu egiten du ikuslea, hasieratik bukaerara, karabanatik zenbat eta gehiago urrundu zoriontasuna orduan eta eskuraezinagoa izango dela jakitun.

ZABALTEGI PERLAK

Catch me daddy

Zuzendaria: Daniel Wolfe.

Gidoilariak: Daniel Wolfe, Matthew Wolfe.

Aktoreak: Sameena Jabeen Ahmed, Conor McCarron, Gary Lewis,Wasim Zakir, Anwar Hussain, Barry Nunney, Shoby Kaman, Adnan Hussain, Ali Ahmad.

Erresuma Batua, 111 minutu.