Euskal LOMCEren bideak horma du amaieran

Atalak: Hezkuntza

Euskara eta Eskola Kontseiluak LOMCE legearen inposizioetatik “aske” geratuko dira EAEn, Eusko Jaurlaritzak Espainiako Gobernuarekin sinatutako akordioari esker. Baina zertan datza adosturikoa eta zenbaterainoko garrantzia dauka?

Ezer ez baino hobea da akordioa, dudarik gabe, baina ez gaitezen engaina, kondarrak dira.

Aspaldi iragarri zuen Jaurlaritzak, baina orain egin da ofizial: ikastetxeetako euskara –eta gaztelania– ordu kopuruak eta hizkuntzen tratamendua erabakitzeko garaian, Espainiako Gobernuak ez du eskurik sartuko, eta pozgarria da hori. Dena den, zer pentsatua eman beharko liguke: murgiltze eredua daukaten beste lurralde batzuk kaltetuko ditu LOMCEk (Katalunia, adibidez), baina EAEren kasuan iritzi dio gure hezkuntza sisteman euskararen eta gaztelaniaren proportzionaltasuna betetzen dela. Hots, hiru hizkuntza ereduen eskemak bermatzen duela ikasleek gaztelania menperatzea. Euskalduntzea, ordea, ez du bermatzen, eta horregatik hiru ereduen planteamendua gainditu behar dela eta murgiltze eredurantz egin behar dela aldarrikatzen du hezkuntza komunitateak.

LOMCEk, bestalde, ikastetxeko zuzendaritzari ematen dio eskolaren kudeaketan botere handiena (jakina, zuzendariaren hautaketan zeresan handia izango du Madrilgo Gobernuak), eta izaera kontsultibora zokoratzen du Eskola Kontseilua (alegia, guraso, irakasle, ikasle eta beste hainbat eragile biltzen dituen organoa). Akordioari esker, Jaurlaritzak kudeatuko ditu zuzendaritzaren eta kontseiluen arteko harremanak, eta kontseiluek egun duten erabakimen ahalmena bermatuko duela ziurtatu du Jaurlaritzak. Ahots kritikoek diote Eskola Kontseiluak agortutako eredua direla eta benetako parte-hartze aktibo eta demokratikorako bide berriak jorratu behar direla (ikasleak, esaterako, ez daudelako nahikoa ordezkatuta), baina hala ere, baikorra da Kontseiluak –hein batean, eskola komunitateak– erabakietan eragin ahal izatea eta dena zuzendariaren esku ez egotea. Zailena zera da, Kontseilua legez kontsultibo izaten jarraituko duela jakinik, praktikan nola arautuko/lortuko du Jaurlaritzak Kontseiluaren iritzia aintzat hartzea zuzendaritzak?

Ezer ez baino hobea da akordioa, dudarik gabe, baina ez gaitezen engaina, kondarrak dira, EAErako “Euskal LOMCE” xamurragoa lortzeko negoziaketek laburra baitute bidea: hezkuntza sistemaren zimendu pedagogiko, ideologiko eta curricularrek Espainiaren menpe jarraitzen dute eta jarraituko dute, baita horretarako kontrol mekanismo nagusiek ere –hots, azterketa eta ebaluazioek–. Negoziaketak negoziaketa, hori ez du aldatuko Madrilek, ez behintzat PPk gehiengo absolutua duen bitartean. Beraz, herritarrok ezin diogu utzi erne egoteari eta bestelako alternatibak planteatzeari.