Obuluak izoztea, kontziliazio tranpatia

Atalak: Ekonomia, Gizartea

Mónica de Oriolek botatakoak eta gero, emakumeen ibilbide profesionala mintzagai da berriz, Apple eta Facebookek martxan jarriko duten neurria medio: obuluak izozteko aukera emango eta ordainduko die enpresak langileei, urte ugalkorrenak lanari buru-belarri eskaini ahal izateko eta seme-alabak gero izan ditzaten, zaharragoak direnean.

Neurri horretatik atera daitekeen ondorioa da bateraezinak direla ama izatea eta profesionalki aurrera egitea.

Eskaintzen dituzten abantaila ugarien artean, bat gehiago baino ez dela diote enpresa hauetako buruek, beti ere emakumearen hobe beharrez, profesionalki gailurrera iritsi daitezen. Baina ene, zeinen hipokrita den ama eta langile izateko erraztasunak eman beharrean (aita eta langile izateak ez du arazorik sortzen, nonbait), zera adieraztea: “Orain, zure urte emankorretan, guretzat lan egin, eta gero, zahartzaroan, zure onena enpresari eskaini ostean, izan umea”.

Neurri horretatik atera daitekeen ondorioa baita bateraezinak direla ama izatea eta profesionalki aurrera egitea. Zorionez, kontrakoa dioten kasu ugari ezagutzen ditugu. Eta hala ez denetan, bi arloak uztartzea ahalbidetu beharko litzateke, adibidez familia eta lana kontziliatzeko langileei malgutasun handiagoa emanez edota seme-alabak zaintzearen ardura amek eta aitek partekatzeko neurriak hartuz, baina zinikoa da seme-alabak oztopo gisa ikusi eta soluzio bezala planteatzea bi arloetako bati uko egin behar diola emakumeak: ama edo langile izatearen artean aukeratu behar badu, zerbait gaizki egiten ari gara gure gizartean.