Uztartu al daitezke Euskal Curriculuma eta LOMCE?

Atalak: Hezkuntza

Euskal Curriculuma osatzea helburu duen Heziberri 2020 planaren baitan, ikastetxeetan landu beharko liratekeen edukien curriculuma zehaztu du Eusko Jaurlaritzak. Zirriborroa helarazi die hezkuntza komunitateko hainbat eragileri eta hilabeteko epea eman die ekarpenak egiteko.

Derrigorrezko ebaluaketetan maila emateko LOMCEren edukiak irakasteak tarterik utziko al du euskal edukiak lantzeko?

Lehenengo begiratuan, bi asmori erantzuteko nahia ageri da dokumentuan: batetik, Euskal Herriko historia, geografia eta errealitatea jorratzen dira edukietan; eta bestetik, LOMCE legeak agintzen eta ebaluatzen dituen edukiak txertatzen dira curriculumean. Espainiak ezarriko dituen kanpo-ebaluaketetarako ikasleak prestatzea eta aldi berean euskal herritar gisa ikasi behar dutena zehaztea da Jaurlaritzak aukeratu duen bidea, nonbait. Baina praktikan, LOMCEk zehazten dituen edukiak asko direla jakinik, modua egongo al da bi errealitateak (bertakoa eta Espainiatik datorrena) jorratzeko? Derrigorrezko ebaluaketetan maila emateko LOMCEren edukiak irakasteak tarterik utziko al du euskal edukiak lantzeko?

ELA sindikatuko Xabier Irastorzak adibidea jarri digu: “Batxilergoan ematen diren edukien helburu bakarra selektibitatea gainditzea da eta horiek memorizatzera bideratzen dira irakaspenak. Kanpo-ebaluazioekin berdin gertatuko da: edukiak ez ezik, pedagogia ere baldintzatuko dute, ikastetxeak akademia bilakatuko ditu, azterketak pasatzeko akademia”. Alegia, Jaurlaritzaren curriculuma teorian geratuko dela uste du Irastorzak, benetako arazoari aurre egiten ez zaion bitartean, LOMCEk ezartzen dituen kontrol mekanismoei aurre egiten ez zaien bitartean (kanpo-ebaluazioei), baldintzatuta egongo delako edozein curriculum.

Euskal Herria eta Espainiako Konstituzioa ikasgai

“Ados, Euskal Herriaren ezagutza sartu dute, erkidegoari dagozkion edukiak… baina Estatutik datozen edukiak, Euskal Curriculumean mantenduko direnak, kezkatzen gaituzte: Espainiako Konstituzioaren ingurukoak adibidez, Monarkiari buruzkoak, Erlijioa… Eta gaitegian zenbat gai dauden ikusita, zenbat eduki memorizatu beharrekoak, zaila izango da kutsu akademikotik harago haurrak bizitzarako prestatzea”, adierazi digu EILAS sindikatuko Ana Perezek. Heziberri LOMCEren alternatiba dela esan arren, ‘LOMCE euskal erara’ dela iritzi dio Perezek, lege espainiarraren funtsak bere horretan dirauelako Jaurlaritzak aurkezturiko zirriborroan.

Iritzi berekoak dira Ikasle Abertzaleak: “Heziberrin LOMCEren curriculuma eta beste aspektu asko mantentzea ez da bidea”. Espainiako legearen aurrean desobedientziara deitu du ikasleen kolektiboak, eta salatu dute Euskal Curriculuma zehazteko prozesu osoan Jaurlaritzak ez dituela kontuan hartu. LABek berriz, argiak ez izatea eta EAEn LOMCEk zein garapen izango duen edo aplikatuko al den garbi ez adieraztea leporatu die.

Zuhurragoa da Ikastolen Elkartea: balorazioa egin aurretik, zirriborroa ongi aztertu nahi dutela erantzun digute. “Izan ere, berebiziko garrantzia du orain ireki den faseak. LOMCE dugu alde batean, Euskal Curriculuma bestean, eta orain ikusi beharko dugu zirriborroa zein aldetan kokatzen den. Hilabete dugu gainera gure ekarpenak egiteko, eta guk horretan sakondu nahi dugu”.

2015-2016rako curriculuma martxan

Euskal Curriculumaren (Heziberriren) arlo pedagogikoa otsailean aurkeztu zuen Jaurlaritzak, gaitasunetan oinarritutako hezkuntza helburu. Orain, eragileekin edukiei dagokien curriculuma adostu eta Legebiltzarrean aurkeztea da asmoa, dekretua onartu eta EAErako Euskal Curriculuma 2015-2016 ikasturtean abiatu ahal izateko.