Irakasleak goraipatzeko onena, baldintzak hobetzea

Atalak: Hezkuntza

Irakaslea naiz kanpaina abiatu du Eusko Jaurlaritzak, irakasleen lana goraipatzea eta gizartean aintzat hartzea helburu. Krisi garaiotako turko-buru izan dira bolada batzuetan irakasleak (sarri politikarien ahotan), haien lanorduak, prestakuntza eta diru-sarrerak epaituz, beraz asmo zintzoa da, baldin eta adierazpenak ekintzez lagunduta badoaz.

https://www.youtube.com/watch?v=UCvY-5Ig3S4

Maisu-maistren egitekoa benetan garrantzitsua eta estrategikoa bada administrazioarentzat, erakutsi dezala. Irakasleen prestigio soziala da Finlandiako hezkuntza sistema arrakastatsuaren gakoetako bat, oso ondo baloratua dagoen ogibidea da; prestigio hori lortzeko, ordea, irakasleek lan fin egin ahal izateko alegia, medioak jartzen ditu Finlandiako botere publikoak: irakaskuntza pertsonalizatua ahalbidetuz (15-16 haur ikasgelako, eta ikasleren batek premia bereziak baditu, 10 haur); autonomia emanez (ikastetxeko curriculumaren %90 herri mailan antolatzen dute); adostasun politikoa bilatuz (Estatu akordio iraunkorrek bermatzen dute hezkuntza sistema); profesionalak prestatuz (kalitate handia dute Magisteritza karrerek, praktiketan oso oinarrituta); edota baliabide eta laguntza publiko inbidiagarriak bideratuz.

Gurean, azpiegiturak hobetzeko premia aldarrikatu dute hainbat ikastetxek, ikasle kopuru ratio zalantzagarriak salatu dituzte, baita murrizketak eta inbertsio falta ere, eta behar bereziak dituzten haurrak laguntzeko hezitzaileen baldintzak okertu izana egotzi diote administrazio publikoari. Sarri, eskuak loturik dituzte irakasleek eta autonomiarako zirrikitu txikiegiak uzten dizkie administrazioak eta hezkuntza sistema arautuak. Alderdi politikoak ez dira gai irakaskuntzari lotutako gutxieneko akordioa lortzeko, eta boterera iritsi ahala nahieran egokitzen dute hezkuntza sistema.

Bai, garrantzitsua da irakasleen lana aitortzea, lan hori egoki egiteko askatasuna, baliabideak eta babes instituzionala ematea bezainbeste.