Zenbat boto arrazista lortu(ko) ditu Marotok?

Atalak: Gizartea

“Gizarte laguntzetako iruzurra bezain nazkagarria da iruzur fiskala”, adierazi du Gasteizko alkateak. Azken finean, iruzur fiskalak 2.000 milioi euroko zuloa uzten du urtero EAEn (13.500 milioikoa ikuspegi ezkorrenen arabera). Eusko Jaurlaritzak kudeaturiko gizarte laguntzetan aldiz, iruzur egiteko asmoa dutenek 3,8 milioi euroko gastua eragin dute  (gizarte laguntzen %0,3). Kurioski, Marotok ez du neurririk, salaketa sutsurik eta sinadura bilketarik abiatu iruzur fiskalari aurre egiteko, bai ordea gizarte laguntzak murriztu eta etorkinak kriminalizatzeko.

Diru publikoa gaizki gestionatzearen ardura gizarte laguntzen sisteman edota etorkinengan zamatzea errealitatea desitxuratzea da. (Arg: La gente rula)

Zilegi da, arrazoituz gero, Diru-sarrerak Bermatzeko Errentaren (DBE) baldintzetan aldaketak proposatzea, baina Errenta hori sektore jakin bati ukatu nahi izatea eta sektore hori funtsik gabe kondenatuz propaganda politikoa egitea demagogia da. Gastu/inbertsio publikoaren pisua eta diru publikoa gaizki gestionatzearen ardura gizarte laguntzen sisteman edota etorkinengan zamatzea errealitatea desitxuratzea da, zer esanik ez esleipen irregularren, proiektu faraonikoen, ustelkeriaren, komisio ilegalen eta gastu eskandalagarrien garaiotan –nabarmendu dezagun, bide batez, Maroto Gasteizko Ogasun zinegotzia zenean Gonzalo Antónekin sinaturiko kontratu susmagarriak 7 milioi euroko zuloa utzi diola Udalari; horra alkatearen moral bikoitza–.

PPko buruzagi bat beste kolektibo baten iruzurraz hitz egiten entzuteak sortzen duen auzolotsaz harago, “badaude goizean delituak egin eta arratsaldean Diru-sarrerak Bermatzeko Errenta jasotzen dutenak”, “etorkinak gizarte laguntzetatik bizitzera datoz”, “asaldatzekoa da nazionalitate batzuek gizarte laguntzekin egiten duten iruzurra, batzuk batez ere laguntza sozialetatik bizi dira, gizarteratzeko asmorik ez dute, batik bat aljeriar eta marokoarrek” gisako adierazpenen asmoa benetan da iruzurrari aurre egitea, ala kolektibo jakinen sorgin-ehiza bultzatu eta krisi sasoiko mamuek lagunduta botoak arrantzatzea? Taberna zuloan esanak balira iraingarriak eta arbuiagarriak liratekeen hitzok, medioetan etengabe errepikatzen dituen alkatearen ahotan arduragabekeria politiko handia ere badira, tentsioa, zatiketa eta etorkinen estigmatizazioa areagotzen dutelako. Egoera ahulenean daudenak babesteko dugun sistema publikoa mugatzea eta batzuk sistema –eta eskubide– horretatik kanpo utzi nahi izatea bide arriskutsua da, politikoki eta sozialki ankerra.

Datuek diote DBE kobratzen duen gehiengoa ez dela etorkina, prestazioa jasotzen dutenak behar dutelako eta dagokielako jasotzen dutela, etorkinek jasotzen dutena baino ekarpen handiagoa egiten diotela Gizarte Segurantzari, lanera datozela… (aurreiritzi ugari gezurtatzen dituzten hainbat datu hemen eta hemen), baina bizi ditugun une gogor hauetan, batzuetan errazago zabaltzen dira hitz eta uste ustelak, datuak eta errealitatea bera baino. Eta Marotok hori baliatu nahi du.

Gogoratu, etorkinak Estatuarentzat kostu handia direla argudiatzen duen Marine Le Penen Fronte Nazionalak Frantziako Estatuko udal hauteskundeetan gorakada nabarmena izan eta lau hilabetera hasi zuen gurutzada alkateak, udan. Gizarte laguntzetan irregulartasunak eta iruzurra salatu zituen, eta aljeriarrak eta marokoarrak hartu zituen jomuga, guztia frogarik gabe (Lanbidek irailean eman zituen DBEren datuak, Javier Marotok gaia Legebiltzarrera eraman zuenean). Sinadura bilketa ere sustatu du herritarren artean, hainbat kolektibori  prestazioak ukatu asmoz. SOS Arrazakeriak gorrotoa bultzatzea eta pertsonen duintasuna urratzea leporatuta, epaitegian deklaratu berri du alkateak, fiskalaren aurrean. Eztabaida eta oihartzuna lortu du Marotok, eta pozik dago: “Inoiz ez dut izan orain bezalako babes sozialik”, dio harro. Gasteizko 78 eragilek, ordea, alkatearen politika baztertzailea salatu dute berriki. Datozen udal hauteskundeetan Gasteizko popularrei zaplaztekoa ematea da denak ez duela balio eta diskurtso arrazista-xenofoboek gizartean lekurik ez dutela erakusteko modurik onena.

Murala Gasteizen. Argazkia: Gasteizko Gaztetxea.