Musulmanei buruzko usteak gezurtatzen

Atalak: Gizartea

Islamofobia ugaritzen ari den garaiotan, Islamaren eta musulmanen inguruko uste ustelak hain azkar –eta interesatuki– zabaltzen ari diren uneotan, komeni da hainbat aurreiritzi gezurtatzea.

Herrialde musulman batzuetako gobernuen politika aitzakia gisa erabiltzen da musulman norbanakoak eta haien kultura mespretxatzeko.

“Arabiarrak, musulmanak eta islamiarrak, denak dira gauza bera”. Ez da hala, sarri denak zaku berean sartzen ditugun arren. Herrialde arabiar batean (22 daude munduan) jaio dena da arabiarra, arabiar hiztuna, eta ez du zertan musulmana edo islamiarra izan, ateoa ere izan daiteke. Musulmanak Mahomaren erlijioa jarraitzen dutenak dira, Islama dute abiapuntu, baina islamiar izan gabe ere izan daiteke musulmana, doktrina eta praktika politiko jakin batzuei erantzuten dien ideologiak gidatzen baititu islamiarrak.

“Musulmanak fanatikoak eta arriskutsuak dira”. Ez dago Islam bakarra, doktrina bakarra, hori baino konplexuagoa da, eta Islamaren jarraitzaile diren musulmanen gehiengo handiak kondenatu egiten ditu Jihad islamiarra edo Estatu islamiarra berrezartzeko indarkeria defendatzen dutenen ekintzak. Areago, Al Qaeda (eta honen baitako ISIS) talde fundamentalistaren eta talibanen biktimak musulmanak dira batik bat. 2010eko datuen arabera, 1.600 milioi musulman inguru daude munduan, eta 46.000 baino ez dira Al Qaedakoak edo talibanak; hots, %0,002a.

“Beste erlijioetako fanatikoek ez dute atentaturik egiten”. Bi adibide: 2006an, Leo Bassi umoregileari, talde ultrakatolikoen mehatxu etengabeak jaso ostean, bonba bat jarri zioten kamerinoan, Madrilen, aretoan 200 ikusle zain zeudenean. Arrazoia: katolikoak iraintzen zituen ikuskizuna egitea. 2011n berriz, Europaren islamizazioari aurre egitea helburu zuen Anders Breivik norvegiarrak 77 lagun hil zituen, atentatu odoltsu batean.

“Mendebaldarrok islamiarren biktimak gara”. Mendebaldeak daraman estrategia geopolitikoan sartu gabe, datu esanguratsu bat: Human Rights Watch erakundeak pasa den uztailean argitaraturiko txostenaren arabera, azken urteotan AEBetan musulman estatubatuarrek egindako atentatu ugariren atzean FBI eta gobernua bera daude: artifizialki antolatutako operazioak izan zirela argitzen du txostenak, eta musulmanek atentatu horiek burutu zituztela agintariek baliabideak eta dirua eman zietelako, horretara presionatu eta bultzatu zituztelako. Azken finean, halako atentatuak argudio paregabea dira kontrol soziala handitzeko eta segurtasunaren izenean –paradoxikoki, baita askatasunaren izenean ere– herritarron eskubideak are gehiago murrizteko.

“Musulmanak matxistak eta atzerakoiak dira”. Zozoak beleari ipurbeltz. Ba al da munduan gaur egun matxista ez den herrialde eta gizarterik? Arlo sozialean ere ezin esan kapitalismo basatian oinarritutako gure gizartea lezioak emateko dagoenik. Maiz, ordea, herrialde musulman eta arabiar batzuetako –ez guztietako– gobernuen politika bidegabea aitzakia gisa erabiltzen da musulman norbanakoak eta haien kultura mespretxatzeko. Kurioski, Amnesty Internationalek behin baino gehiagotan salatu duenez, emakume musulmanek oztopo asko dituzte lan munduan sartzeko… Europan, eta buruan zapia eramatea da traba handietako bat. “Askotan galdetzen didate hijab edo beloa daraman emakumea feminista izan al daitekeen. Nik zera erantzuten diet: biluzik doan emakumea feminista da ezinbestean? Nire ustez, gorputza estaltzea edo biluztea txanpon bereko bi aldeak dira. Emakume bat biluzik egoteak ez du esan nahi askea denik. Kontua da, zergatik ezkutatu edo erakutsi behar dugu gure gorputza ezer aldarrikatzeko? Bi kasuetan haragi zati hutsa balitz bezala jokatzen dugu”, adierazi zigun Nawal Al Saadawik, Emakume arabiarren askapen mugimenduko kideak. Hamarkada luzez aztertu ditu Judaismoa, Islama eta Kristautasuna, munduko hiru erlijio monoteista nagusienak, eta ondorio garbia atera du: “Zoritxarrez, emakumeak zapalduta mantentzeko interesa dute hirurek”.

“Ez da xenofobia kontua”. Ziur ezetz? Europan musulmanek eta arabiarrek mota askotako diskriminazioa jasaten dutela garbi adierazi du Amnesty Internationalek. Guk nahiago dugu, arrazakeriarekin zerikusirik ez duelakoan, musulman estereotipatuen irudia barneratu, haiek ezagutu, ulertu eta elkarbizitzarako oinarriak jarri beharrean. Esanguratsua da europarron pertzepzioa: musulmanez inguratuta gaudela uste dugu, egia ez den arren. Europar Batasunean, Espainiako Estatua da musulman proportzio gutxien duen Estatua (herritarren %2) eta musulman gehien dituela uste duena (herritarren %16 musulmana dela uste dute herritarrek):