“Ez naiz nire alabaren agenda”

Atalak: Hezkuntza

Seme-alabari ahaztu egin zaizkiola eskolan bidali dizkioten etxerako lanak? Zehazki zein ariketa egin behar den ez duela apuntatu? Arazoa konpontzeko whatsapp taldea erabiltzen du ama talde batek: gainerako amei galdetu, eta ariketei buruzko informazioa eta argazkiak elkarbanatzen dituzte. Ametako batek ordea, Noelia López-Chedak, planto egitea erabaki du.

Haur babestuegiek arazoak izan ditzakete autonomia garatzeko (Irudia: Garbine Ubeda)

Alabaren agenda izateari uko egin diola kontatu du blogean, eta zeresana eman du idatziak. Zentzuzko argudioak eman ditu eta adierazi du seme-alaben agenda izateak besteak beste zera dakarrela:

* Ardurarik hartzen ez duten haurrak.

* Edozer gauza egitearen beldur diren haurrak, gure begiak gainean dituztelako huts egiten ote duten kontrolatzen, euren zeregina dena guk hobeto egingo diegula pentsatuta.

* Beste gauza batzuetan arreta jartzea nahiago duten haurrak, zeren gauza hauetarako “amatxo dago”.

* Helduagoak direnean, edozer egiten hasteko argibideak eta aginduak esperoko dituzten haurrak.

Ezezkorik jasotzen ez duten haurrak

Umeei euren autonomia garatzen uztea zeinen garrantzitsua den jorratu genuen Haur babestuegiak: Seme-alaben esanetara erreportajean. Bertan, Iñigo Ochoa de Alda terapeutak adierazi zigun guraso batzuek gaizki daramatela haurraren samina, umeak angustiarekin bizi duela ulertzen dutelako, eta ez ikasketa prozesu moduan, “baina haurrari ez badiozu uzten sufritzen eta frustrazioa sentitzen, ez diozu uzten bere kabuz ikas dezan egoera ezkorrei aurre egiten”.

Bestalde, zioen, “gurasook etengabe jartzen dugu zalantzan nahikoa ote den egiten duguna, lehen lasaiago hartzen zituzten gauzak, baina gaur egun gure buruari asko exijitzen diogu eta horrek batzuetan ez digu uzten ikusten umeari den-dena ematea ez dela guraso ona izatea”.

Haurrak gehiegi babestea ondorioak izan ditzakeela ohartarazi zuen Ochoa de Aldak, hala nola haurrak ez bereiztea zer dagoen ondo eta zer gaizki, egoera ezkorrei aurre egiten ez ikastea, harreman sozialetarako baliabiderik ez garatzea, ezezko bat jasotzen ez jakitea eta frustraziorako gaitasunik ez izatea, heldutasunaren eta autonomiaren bidea ez jorratzea, sormena eta iniziatiba ez bultzatzea, joera beldurti, lotsati, ahul eta zalantzatiak sortzea…