Haurrak arrakastarako heztearekin obsesionatuta

Atalak: Hezkuntza

Krisi garaiak areagotu egiten omen du lehia heziketan. “Langabeziak eta etorkizun ilunak larrituta, seme-alabentzat heziketa perfektua bilatzen dute gurasoek eta espiritu lehiakorra kutsatzen diete”, dio Berthold Vogel soziologo alemaniarrak.

Norberak egin dezala gogoeta “heziketa perfektua” eta “arrakasta” gisako kontzeptuez.

“Heziketa perfektua”, heldua denean goi mailako lanpostu arrakastatsua (hots, ordainsari ekonomiko ederra eskuratzeko moduko kargu on bat) lortzearekin lotzen du hainbatek, eta horretarako txiki-txikitatik ikasketa prozesu diziplinarioa jasotzearekin, ahal bezain azkar ahal bezainbeste eduki, gaitasun, hizkuntza… barneratu ditzaten jaiotzen direnetik.

Beste leku batzuetako paranoiatik urrun gauden arren (New Yorken haurreskola “onena” bilatzen duten sei familiari buruzko Nursery University dokumentala ikusi bestela), zero urteetatik ingelesa ikasteko, matematiketan trebatzeko edota irakurtzen hasteko programak eskaintzen dituzte haurreskola elitistenek, estimulazio goiztiarra sustatzearen aitzakiapean. Haurrak txikitatik mota guztietako jardueratan eta akademietan sartzen dituztenak ere ez dira gutxi.

Matrikulazio garaia den honetan, norberak egin dezala gogoeta “heziketa perfektua” eta “arrakasta” gisako kontzeptuez, haurrarentzako eskola aukeratzerakoan baloreek, jakintzek, erritmoek, gogoek, jolasek… izan behar duten pisuaz, eskolaz kanpoko jardueren aukeraketa haurragatik ala gurasoen nahiagatik egin den, edota LOMCE modukoek sustaturiko hezkuntza ibilbideetan primeran moldatuko diren haur lehiakor eta diziplinatuak nahi ote ditugun, gurasoek amestutako karrerak/lanpostuak amets.