Feminismoa beherapenetan

Atalak: Gizartea

Feminismoaren medaila zintzilikatzea gustuko dugu eta gero eta elkarte, talde, erakunde, pertsona… gehiagok gehitzen dio etiketa feminista bere buruari. Berdintasunaren alde nagoenez, feminista naiz. Kito.

Gainerakoei feministak garela aldarrikatzea baino gehiago dagokigu egunerokoan berdintasunaren alde egitea.

“Feminismoak aitortza bat lortu duen heinean gai saihestezina bihurtu da herri mugimenduetan eta baita administrazioan ere, baina agian kritiko izan behar dugu eta pentsatu ez ote diogun garrantzi handia eman terminoa hor jartzeari eta ez hainbeste jarduera, izaera eta filosofia aldatzeari. Feminismoaren beherapenak dira nolabait, mugimendu feministako kide batentzat feminismo hitzaren atzean dagoen konplexutasuna eta zentzua ez baitu hartzen ziurrenik manifestu edo estatutu askotan erabiltzen den feminismo hitzak, ez dago zentzuz hain betea”, adierazi digu Jokin Azpiazuk Gizonak eta feminismoa: Botereari uko egiteko ordua mahai-inguruan.

Alegia, berdintasunaren alde egoteak baina gehiago ez hausnartzeak eta sakontzeak feminismo urardotua orokortu duela hainbatetan: aski da parekidetasuna aldarrikatzea, ala jarrerak, botere guneak, antolatzeko moduak, desorekak, pribilegioak, harremanak… kuestionatzen ez dituen elkarteak/pertsonak beherapenetako feminismoa egiten du?

Izena izanaren aurretik jartzen badugu, ez dugu gureganatuko mugimenduak duen benetako karga, sakontasun eta konpromisoa. Eta berdin beste borrokekin, denak garelako ekologistak, autoa ez hartzeko edo hondakinak modu berdeagoan gestionatzeko ahalegina eskatzen zaigun arte; inor ez da arrazista baina ai, zenbatek ez duen nahi ijitorik alboko pisuan; inor ez da homofoboa, bere “gizontasuna” zalantzan jartzen duten arte…

Denak gara politikoki zuzenak, eroso sentitzen dugun eremua ukitzen duten arte. Eta beharbada, gainerakoei feministak garela aldarrikatzea baino gehiago dagokigu eguneroko praktikan eta jardueretan benetan berdintasunaren alde eta patriarkatuaren kontra egiten saiatzea.