Hezkuntzaren desorekak

Atalak: Hezkuntza

Batez beste ikasleek 7 bat lortzea ez da zoriontzekoa, baldin eta erdiak “Bikain” atera badu eta beste erdiak “Gutxiegi”. Hezkuntza politikak ebaluatuz ateratzen dituzten rankingak tranpatiak dira batzuetan, funtsezko aldagai bat ez dutelako kontuan hartzen: oreka.

Denentzako irakatsiko duten ikastetxeak, ereduak eta politikak behar ditugu.

Alegia, 7 horretara ahalik eta ikasle gehien gerturatzea lortzen duen eredua izango da egokiena, eta ez batzuk aintzat hartu eta besteak alboratuko dituena. Horregatik, harrigarria da atera duten azken rankingak goraipatzea zeinen garrantzitsua den hezkuntza pribatua emaitzen arrakastarako. Ikasle guztientzako hezkuntza politikak behar ditugu, ez dirua duten gurasoen seme-alabak saritu eta klase baxukoak zokoratuko dituztenak; hezkuntza sare eta ikastetxe orekatuak behar ditugu, ez lehenengo mailako eta bigarren mailako ikastetxeak; ez da onargarria premia handienak dituzten ikasleak eta sozioekonomikoki zailtasun handienak dituzten familien haurrak ikastetxe jakinetan kontzentratzea; ez da onargarria baliabideak nota onenak biltzen dituzten eskoletara zuzentzea, behar gehiago dituzten ikastetxeei –ikasleei– eman beharrean.

Denentzako irakatsiko duten ikastetxeak, ereduak eta politikak behar ditugu, ahalik eta gazte gehienek helburu duinak lortzera bideratuak, eta ez desorekak sortzen dituzten praktikak, batzuen mesedetan, eta besteen kaltetan.