Eta ikasleei eskatuko bagenie azterketek eragiten dietena irudikatzeko?

Atalak: Hezkuntza

Kanpo-ebaluazioek 12 urteko bere ikasleengan “sentimendu andana” sortzen zituztela ikusi zuen Christina Chang AEBetako Arte irakasleak, eta hori guztia artistikoki adierazi eta kanporatu behar zutela erabaki zuen.

“Azterketa hauek sorturiko estresak haurren ikasketa prozesua oztopatzen du”.

Emaitza argia izan da: “Estresa da haurren obra artistikoek partekatzen duten elementua. Denen lanetan islatzen da ez dituztela gustuko azterketa hauek, estres handia sortzen dietela. Ebaluatzeko modu hoberik egon behar du”.

Estresaz gain, urduritasuna, ikara edo porrota dira sentimendu errepikatuenetakoak.

Hemen egiten diren errebalidekin alderatu ditzakegu kanpo-ebaluazio horiek eta Chang irakasleak garbi du: “Proba hauek ikasleengan sorturiko estresak haurren ikasketa prozesua oztopatzen du”.

Azterketarik gabeko ebaluazioa

Gurean, lau ikastolatan proiektu pilotua dute martxan, ebaluazio hezigarria oinarri. Ohiko azterketen eta noten ordez, irakasle eta ikasleak elkarrekin ebaluatzen ikasten ari dira, norantz jo eta hori lortzeko zer egin abiapuntu hartuta. Ekimeneko formatzailearen hitzetan, proiektuan parte hartzen ari diren irakasleek diote “ez dutela azterketen beharrik; ikasleak ebaluatzeko nahikoa ebidentzia jasotzen dituztela bestela ere. Azken batean, notaren atzean zer egon beharko litzateke, amaierako proba batean lortutako emaitza ala prozesu guztiaren garapena?”. Hezkuntza sistema orokorrean ikasleak ebaluatu beharrean kalifikatu egiten direla kritikatzen du: “Kalifikatu, sailkatu, egiten dira, eta hori ezin da izan ebaluatzeko modua derrigorrezko hezkuntzan, ez baitu ikaskuntzaren hobekuntzarako aukerarik ematen”.

Christina Chang irakasleak haurren lan artistikoak ikusgai jarri ditu bere webgunean. Hona irudi batzuk: