Ongi etorri Dismalandera. Errealitatea ez da ipuinetan bezalakoa

Atalak: Artea, Gizartea

Banksy artistaren azken proiektua da Dismaland (“Lurralde etsigarria”, ingelesez). Ingalaterran irekitako parke tematiko hau Disneylanden satira da eta egungo gizarteaz gogoetatzen du.

Barruan, paparazziek inguratutako printzesa hila, petrolio kupelen gainean eraikitako mini-golfa, polizia-furgonetatik jaisteko txirrista edota itsasoko sirena desitxuratua aurkituko ditugu. “Egun-pasa familiar estandarren azukrez estalitako hutsalkeria arimarik gabeaz nekatuta zaude? Orduan, hau da zure lekua, ihesbide zentzugabetik ihes egiteko mundu berri kaotikoa”. Hala dio iragarkiak.

Besteak beste, celebrityen kultura, migrazio politika, gerra, ustelkeria, animalienganako tratu txarrak, bankuak, kontsumismoa eta legearen inposaketa lantzen ditu parkeak, ikuspegi kritikotik. Atrakzio ugari, 17 herrialdetako 58 artistaren lanak, film laburren emanaldiak, kontzertuak, ekitaldiak… eskainiko dituzte horretarako, irailaren 27ra bitartean.

“Arte, dibertsio eta anarkismo jaialdi bat” da lekua, Banksyren hitzetan.