Presio herritarraren aurrean entzungor mantenduko al dira Europako agintariak?

Atalak: Gizartea, Nazioartea

Herritarrek eta udalek errefuxiatuak hartzeko prest daudela ozen aldarrikatzen duten bitartean, errefuxiatu horiei bidea irekitzeko erabakimena duten Europako agintariek arduragabekeria politiko eta sozialean tematuta jarraitzen dute.

Errefuxiatuei elkartasuna erakutsi diete Iruñeko herritarrek (Ahotsa.info).

Errefuxiatuak hartu ditzatela eskatu diete euren udalei herritarrek, etxean hartzeko prest agertu dira, iritsi berriei arropa, janaria eta babesa ematen ikusi ditugu alemaniarrak… Gizartearen eta tokian tokiko politikarien borondatea garrantzitsua eta erabakigarria izaten ari da, baina errefuxiatuen krisiari aurre egiteko, hein handi batean estatuburuek dute eskumena: mugetan harresiak eraiki eta polizia jarri ordez bideak irekitzeko, heriotzatik ihesi datozenak gure herrialdeetan birkokatzeko.

Oro har, mandatarien maila lotsagarria izaten ari da, nork errefuxiatu kuota txikiena lortzeko (edo zuzenean errefuxiaturik ez hartzeko) lehian eta harresi gero eta handiagoak eraiki nahian. Europako Batzordeak proposatuko dituen kuotekin ados ez daudela aurreratu dute jada Espainiak, Frantziak eta Britainia Handiak. Irailaren 14ra arte ez dira bilduko 28 estatuetako Atzerri ministroak; larrialdi bilera izateko, patxadaz jarri dute data. Estatuburuak berriz (erabakiak hartzeko benetan ahalmena dutenak), urrira arte ez dira elkartuko.

Drama humanitarioa baino zerbait gehiago

Hain da iraingarria, Merkel Europarako politika bateratuaz hitz egiten entzutea, joan den apirilean 1.400 migratzaile hil ostean ez zirenean gauza izan herrialde bakoitzak hartu beharreko pertsonen kuotak ezartzeko (mugen kontrola areagotzea adostu zuten, hori bai); hain da iraingarria Hollande drama humanitarioaz hitz egiten entzutea, Europak erantzukizunik izango ez balu bezala Siria, Libia, Irak edo Afganistango egoeran, herrialde haietan eskua sartu eta hankaz gora utzi ondoren alde egin izan ez balu bezala, hango errealitateari irtenbidea bilatzeko inplikatzea bere betebeharra ez balitz bezala. Hain da iraingarria Rajoy elkartasunaz hitz egiten entzutea, Espainiako Estatu osoan 2.470 errefuxiatu hartzeko prest dagoela adierazi duenean, lotsagorritu gabe (15.000 proposatu ditu Espainiarentzat Europako Batzordeak).

Migratzaileei bizkarra eman diete agintariek. 1937an, Ingalaterran euskal ume errefuxiatuak hartzeko erabakigarria izan zen herritarren presioa. Europar biztanleon aldarriak aldatuko al du EBren jarrera ala gizarteari ere entzungor izango zaio?