Zahar etxean haurreskola irekitzea, bizitza eraldatu dien esperientzia

Atalak: Gizartea, Hezkuntza

Ume eta zaharren arteko harremanak goxoak dira, batzuetan deserosoak, bestetan umoretsuak, “beti ere hunkigarriak eta hain benetakoak!”. Zahar etxe batean ireki duten haurreskolaz dokumentala egiten ari den Evan Briggsen hitzak dira.

400 adinekotik gora hartzen dituen Seattleko (AEB) zahar etxe batean, astero bost egunez umeak eta zaharrak elkartzen dira Belaunaldiarteko Ikasketa Zentroa deituriko haurreskolan. Abestea, dantzatzea, margotzea, ipuinetan murgiltzea, janaria prestatzea, jolastea edo besterik gabe elkarrekin aritzea dira euren eguneroko jarduerak.

Belaunaldi arteko halako esperientziak denentzat dira onuragarriak: adinekoak biziberritu egiten dira, autoestimua hobetzen dute eta umeen alaitasuna eta barrea kutsatzen zaie. Zaharren esperientziatik ere ikasten dute haurrek, baita beharra duten zaharrei lagunduz ere. Maitasun handia arnasten da Seattleko zahar etxean, dokumentalgilearen hitzetan.

“Gizarte segregatua gara, adinekoen jakinduria galtzen ari gara”

“Dokumentala errodatzeak balio izan dit ikusteko zeinen gizarte segregatua bilakatu garen”, dio Evan Briggsek. Zaharrekin eta zahartzaroarekin dugun harreman disfuntzionalaz gogoetatu nahi izan du zinegileak: “Zer nolako balore sistema dugu, adin batetik aurrera jendeak lekurik ez izateko gizartean? Jakinduria eta esperientzia handia dago adinekoengan eta hori guztia galtzen ari gara”. Adinekoen %43 sozialki isolatuta bizi da AEBetan, bakardadeari, depresioari eta gainbehera fisiko eta mentalari lotuta.

Briggsek ikasturte bat eman du dokumentala errodatzen, finantzazioa lortzeko crowdfunding kanpaina arrakastatsua egin du eta 2016an estreinatuko du emaitza: Present Perfect.