Errefuxiatu ez diren gainerako etorkinei, ostikoa?

Atalak: Gizartea, Nazioartea

Merkel-Hollande tandemak argi utzi du: Europara iristen diren errefuxiatuen erregistro zentroek dute lehentasuna, eta “baldintzak betetzen ez dituztenak” lehenbailehen itzuliko dituzte euren jatorrizko herrialdeetara.

Ez al genuke egoera baliatu behar errefuxiatuenganako politikan eman daitezkeen aurrerapausoak migrazio politika osora zabaltzeko? (Irudia: El Faro de Vigo).

Estatuburuek ez ezik, gainerako politikari eta herritarrek ere, kontziente edo inkontzienteki, ondo barneratu dugu bereizketa: errefuxiatuak batetik, eta gainerako etorkinak bestetik, migratzaileen artean eskubide mailaketa egitea zilegi bailitzan. Baina zuzenean gerratik ez datozelako ateak itxi behar dizkiegu siriar edo libiarrekin batera egoera zailetatik ihesi Hungariako mugan pilatzen direnei? Afrikako lurralde “baketsuetatik” alde egin eta Mediterraneoan bizitza arriskatzen dutenei?

Ados, ezohiko egoera bizi dugu, gerra saihestu nahi duen jende andana dugu Europako ateetan premia larrian, eta Europaren betebeharra da berehalako erantzuna eman eta asiloa eta babesa eskaintzea. Baina ez al du asilo eta babes bera behar gosetearen lurraldetik datorrenak? Ez al du premia bera miserian bizi denak? Eta batez ere, aferak bultzatuta Europar Batasuna neurriak hartzen hasi dela ikusita, ez al genuke egoera baliatu behar errefuxiatuenganako politikan eman daitezkeen aurrerapausoak migrazio politika osora zabaltzeko? Finean, ateak denentzat egon daitezen zabalik.

Bestela, hartzen diren neurriek egoera puntual honi erantzungo diote, baina Europak gotorleku izaten jarraituko du migrazio jakin batekiko, eta bide legalik ez dagoelako hiltzen segituko du jendeak, ailegatu nahian. Diskurtso tranpatia izan daiteke errefuxiatuez eta etorkinez modu bereizian hitz egitea. Agustin Unzurrunzagak nabarmendu moduan, “jendeak emigratzen du jaioterrian gaizki dagoelako. Batzuetan gerra dagoelako, bestetan premia larrian delako, etorkizunik ez duelako… Faktore ugariren nahasketa izan ohi da eta bereizketa egitea antzua da”.