“The Assassin”, hiltzaile patxadatsua

Atalak: Zinemaldia 2015

Geldoa, hitz gutxikoa eta konplexua da Nie Yinniang (The Assassin). IX. mendeko Txinara garamatza Hou Hsiao-hsien zuzendari taiwandarrak eta filmean irudikaturiko gorteetako munduak harrapatu ezean, istorio lau eta pisutsua gerta dakioke ikusleari.

Ni behintzat, ez nau harrapatu. Nahiz eta emakume ausarta, indartsua eta abila duen protagonistatzat, denak beldurtuta dituen “beltzezko emakumea”. Nahiz eta katana- eta daga-borroka interesgarriez –baina urriez– gozatzeko aukera eskaintzen duen. Nahiz eta mimoz zaindutako irudi eder eta preziosistez beteta dagoen, paisaian, jantzietan, eszenografian. Baina konspirazio aldrebesek, istorio irregularrak eta kontakizun lauak ez naute konbentzitu.

Hiltzaile garaiezin bilakatuta etxera bueltatu da Nie Yinniang gaztea. Horrela abiatzen da Taiwango zuzendari prestigiotsuenetarikoaren azken lana. Film honengatik zuzendari onenaren saria irabazi du aurten Cannesko jaialdian.

PERLAK

Nie yinniang (The Assassin)

Zuzendaria: Hou Hsiao-hsien.

Gidoilariak: Cheng Ah, Chu T’ien-wen, Hou Hsiao-hsien, Hsieh Hai-meng, Xing Pei

Aktoreak: Qi Shu, Chen Chang, Satoshi Tsumabuki.

Taiwan, 104 minutu.