“Sicario”, tentsioa tiro artean

Atalak: Zinemaldia 2015

Basatia da hasiera, etorriko denaren aurrerapena. Tiroak, ezustekoak eta odola borborka ditu Sicariok, generoaren maitaleentzat pelikula handia, eta gainerakoentzat, ezin ukatu, bi orduz tentsioan mantentzen zaituen lana.

Mexikoko droga kartelak eta polizia estatubatuarrak, beste behin, aurrez aurre, gerra zikinaren joko arriskutsuan nahasturik. Juárezera garamatza Denis Villeneuve zuzendariak, bortizkeriaz, torturaz, senideekin maitagarriak diren capoez eta eskrupulu gutxi duten poliziez zipriztindutako pelikula honetan. Aukeran, efektistegia da filma, akzio artifiziosoegia dario hainbatetan, estereotipo nekagarriak errepikatzen ditu sarri. Aukeran, gehiago gustatu zitzaigun Villeneuvek berak iaz Donostiako Zinemaldian aurkeztu zuen Prisonners ikusgarria.

Baina amaierara arte ikuslea aulkian tinko daukan thrillerra ere bada Sicario. Eta azpimarratzekoa da aktoreen lana: ederto Josh Brolin, ongiaren eta gaizkiaren gainetik dagoen poliziaren rolean; primeran Emily Blunt, gauzak zuzen egin nahi dituen poliziaren paperean; bikain Benicio del Toro, narkotrafikoaren mundua menperatzen duen tipo iluna antzezten.

PERLAK

Sicario

Zuzendaria: Denis Villeneuve

Gidoilaria: Taylor Sheridan

Aktoreak: Emily Blunt, Benicio del Toro, Josh Brolin

AEB, 122 minutu.