“Hitchcock Truffaut”, zinefiloentzako masterclass ederra

Atalak: Zinema, Zinemaldia 2015

“Logika aspergarria da”, dio Alfred Hitchcock zine-zuzendariak, dokumentalaren une batean. Izan ere, suspentsearen maisuak logika baino maiteago zituen misterioa, tentsioa eta jolasa. Horretaz guztiaz mintzatzen entzungo diogu dokumentalean Hitchcock berari, zinemari buruzko masterclass bikain honetan.

François Truffaut zuzendari frantziarrak Hitchcock elkarrizketatu zuen zortzi egunez, eta material horrekin liburua osatu zuen (Le cinéma selon Hitchcock), edozein zuzendariren oinarrizko eskuliburua eta benetako harribitxia. Orain, Kent Jones-ek elkarrizketa hartako audioak pantailaratu ditu eta bi zuzendari handien gogoetez gozatzeko aukera eman digu ikusleoi. Zinemaren gako eta trikimailuez, planoez, espazioaz eta argiaz, publikoaz, sentsazioak transmititzeaz, detaileen garrantziaz, ametsen munduaz, zuzentzeko estiloez… finean, zinemaz hausnartzen dute biek, baita dokumentalean tarteka agertzen diren zuzendari garaikide ezagunek ere (Martin Scorsese, David Fincher, Wes Anderson, Akira Kurosawa…). Hitchcocken filmografiari errepasoa eginez eta pelikula horien atzean dauden klabeak deszifratuz egiten du aurrera filmak, erraz eta arin, errealizazio sinple bezain eraginkorrari esker. Artistatik harago, aktoreak oso gaizki tratatzen zituen gizon hori pertsona bezala nolakoa zen ere erakusten digu lanak.

Psycho, The man who knew too much edo Vertigo bezalako filmekin publikoa bereganatzen jakin zuen zuzendariari, zinemagintzako arau idatziak apurtu zituenari eta haren pelikulez disfrutatu duten guztiei omenaldi txukuna egin die Jonesek.

PERLAK

Hitchcock / Truffaut

Zuzendaria: Kent Jones

Frantzia-AEB, 80 minutu.