“Irrational Man”, %100 Woody Allen

Atalak: Zinema, Zinemaldia 2015

Ados, ezagunak zaizkigu existentzialismoz betetako dialogoak, maitasunari buruzko gogoetak, Woody Allenen ahotik ari bailitzan protagonistak dituen obsesio, beldur eta desioak. Sentsazioa daukagu pelikula hau dagoeneko ikusi diogula zinemagile estatubatuarrari, eta hala ere, originala, probokatzailea eta zirikatzailea da Irrational Man, zaleek gustura ikusiko dutena.

Une pertsonal zaila bizi duen Filosofia irakasle berria iritsi da unibertsitatera. Bere ikasleetako batekin hasiko duen harremanak eta hilketa batek harilkatuko dute istorioa. Alegia, kutsu poliziako beltza eta bizitzari eta sentimenduei buruzko hausnarketa dario filmari, beste behin ere. Haatik, errepikakorra baino, entretenigarria da emaitza, ongi errodatua, arina eta primeran antzeztua. Woody Allen gai da Hollywoodeko izarren parte-hartzea lortzeko eta oraingoan ere, bi aktore ezagun ditu protagonista: Emma Stone (ikaslea) eta Joaquin Phoenix (irakaslea). Lan ona egin dute biek ala biek, bereziki Joaquin Phonixek, bizitzaz paso egiten duen filosofo galduaren rolean.

Sarritan ikusi ahal izan dugu Woody Allenen lanen bat Donostiako Zinemaldian. Urtero pelikula bat egiteko erritmo geldiezina mantendu nahi du New Yorkeko zuzendariak eta hainbeste pelikula bizkarrean, ez da erraza jakiten ekarriko duena bere film onen ala txarren multzokoa izango den. Oraingo honetan, esango nuke azken lanak ez diela hutsik egingo jarraitzaile fidelei.

PERLAK

Irrational Man

Zuzendaria eta gidoilaria: Woody Allen

Aktoreak: Joaquin Phoenix, Emma Stone, Parker Posey.

AEB, 95 minutu.