“Mountains May Depart”, melodrama atipikoa

Atalak: Zinema, Zinemaldia 2015

Melodrama atipikoa da Shan He Gu Ren (Mountains May Depart), gaztaroko ametsak helduaroan nola zapuztu daitezkeen erakusten digun istorio ausarta eta bitxia. Une batzuetan sakona eta ederra, une batzuetan irregularra eta galdua.

XX. mende amaierako Txinan du abiapuntua pelikulak: 25 urteko hiru lagun, bizitzak eskaintzeko daukan guztiaz gozatzeko irrikaz. 2025. urtean amaituko da filma (bai, oraindik bizi ez dugun etorkizunera ere bagaramatza zuzendariak, horrek ahalbidetzen dizkion lizentziak hartuz), eta ordurako, hiru gazte haiek eurentzat irudikatu zuten etorkizuna oso bestelakoa da, frustrazioz, minez eta kolpez betea. Sotilki, hiru pertsonaia hauen bidez Txinako gizartearen bilakaeraz, deserriaz, belaunaldi arteko talkaz, arrakastaren kontzeptuaz eta kapitalismoaren indarraz hitz egingo digu Zhank-ke zinegileak. Trama nagusia eta atzealdeko azpigai horiek guztiak txukun harilkatu ditu zuzendariak, generoaren topikoetan eta gehiegikerietan jausi gabe, baina bat-batean bide berri bat hautatu eta bi pertsonaia nagusien semearen ikuspuntuari helduko dio kontakizunak, ikuslea apur bat galduta utziz eta ordura arteko erritmoa desorekatuz.

Horregatik guztiagatik, melodrama ezohikoa da hau, bazkalosteko telefilm estatubatuarretatik oso urrun, maitasun ezinezkoez eta familiarteko gatazkez beste klabe batzuetan hitz egin daitekeela eta genero honetan arriskatu daitekeela frogatzen duena.

PERLAK

Shan He Gu Ren (Mountains May Depart)

Zuzendaria eta gidoilaria: Jia Zhang-ke

Aktoreak: Zhao Taio, Liang Jin Dong, Dong Zijian.

Txina-Frantzia-Japonia, 131 minutu.