“El clan”, mafia argentinar erara

Atalak: Zinema, Zinemaldia 2015

Mafia italoamerikarraz dakigun guztia Sopranotarrek eta Corleonetarrek oparitu digute, bada mafiaren bertsio argentinarra dira Pucciotarrak, El clan pelikulako protagonistak. Generoaren kodigoei muzin egin gabe, elementu berriak eskaintzen ditu pelikulak, emaitza potentea lortuz.

Familia babesten eta zaintzen duen bitartean hiltzen eta bahitzen duen capoa, eguneroko lasaiaren atzean ezkutatzen den bizimodu kriminala, mahaiaren bueltan errezatzen duen bezala estortsioa eta mehatxua praktikatzen duen jendea… Pelikulak mafia munduaren hiztegia baliatzen du, baina politika ere badu istorioak, garaiko gizarte baten erretratua, administrazioko goi karguen ustelkeria, drama ukitua, hainbat pertsonaiengan sortzen den diru-gosearen eta etikaren arteko talka… 80ko hamarkada hasieran Argentinan gertaturiko egiazko istorioa da El clan, eta generoaren klabeak errealitatearekin uztartzen ditu Pablo Trapero zuzendariak. Uztarketa hori da interesgarriena, benekotasuna dariolako kontakizunari. Denboran saltoak emanez narratzeko hautatu duen moduak ere laguntzen dio istorioaren erritmoari.

Finean, joko handia ematen duen mafia munduari buelta bat eman dio Pablo Traperok, eta pertsonaien lanketari ere garrantzia eman dio, ohiko familia tradizional bat halakoak egitera edo beste alde batera begiratzera zerk bultzatu duen interesez jarraituko baitu ikusleak. Argentinako zine aretoetan behintzat, arrakasta handiz estreinatu dute lana.

PERLAK

El clan

Zuzendaria eta gidoilaria: Pablo Trapero

Aktoreak: Guillermo Francella, Peter Lanzani, Lili Popovich, Gastón Cocchiariale.

Argentina-Espainia, 108 minutu.