Lanean robot batek ordezkatuko al zaituen egiaztatu

Atalak: Ekonomia

Hurrengo bi hamarkadetan lanbideek jasango duten automatizazio prozesua aztertu eta interneten neurgailua jarri dute eskura, norberaren lanbideak izango duen robotizazio maila egiaztatzeko. Egungo lanbideen %35ak konputerizatzeko arrisku oso handia duela ondorioztatu dute.

Oxford unibertsitateko ikerlariek egin dute azterketa Erresuma Batuko datuen arabera, baina hein batean emaitzak gure errealitatera ere estrapolatu daitezke. Lan mota jakin bat burutzeko beharrezkoak diren bederatzi aldagai edo gaitasun hartu dituzte kontuan: ulermen soziala, negoziazioa, pertsuasioa, besteak artatu eta zaintzea, originaltasuna, arte ederrak, trebezia hatzetan, trebezia eskuetan, eta eremu estuan lan egin beharra.

Rankineko lehenak eta azkenak

Ikerketaren arabera, automatizazio arrisku handiena duten langileak telefono saltzaileak, mekanografo edo teklatuarekin lotura duten antzeko langileak eta idazkari legalak dira. Arrisku txikienetakoa dute, aldiz, psikologoek, hezkuntza aholkulariek, hotel jabeek edota osasun kudeatzaileek.

Neurgailuarekin proba eginda, kazetarion automatizaziorako aukera txikia da, %8koa. Nekazariena berriz, nahiko handia: %76koa.