“Oscarretarako hautagai izatea ‘Loreak’ filmari foku bat jartzea da”

Atalak: Zinema

Oscarretarako hautagai da Jose Mari Goenaga eta Jon Garañoren Loreak filma, ingelesezkoa ez den film onenaren kategorian. Espainiako Arteen eta Zientzia Zinematografikoen Akademiak aukeratu du ordezkari, eta halako aukera duen euskarazko lehen filma izango da (Hollywoodeko Akademiari dagokio orain kategoria horretan aurkeztutako lan guztien artean bost finalistak erabakitzea). Albisteari buruz eta pelikularen arrakastaren gakoez galdetu diogu Jon Garañori.

“Jendeak oso modu diferentean harrapatzen duen pelikula da”. Irudian, filmaren zuzendariak (Arg: Dani Blanco)

Lan taldearentzat eta filmarentzat, zer esan nahi du hautaketa honek?

Pertsonalki guretzat izugarri pozgarria da albistea, eta filmarentzat oso garrantzitsua, gainean foku bat jarri diotelako eta horrek esan nahi du jende gehiagok ikusteko aukera dagoela; hori da azken finean bilatzen duguna. Fokua nazioarte mailan ere jarri zaio, pedigri bat edo etiketa bat ematen dio pelikulari, industriara eta merkatura zabaltzeko beste ate bat irekiz. Azkenik, euskal zinemarentzat ere aukera ona da, hemen gaudela adierazteko.

Espainiaren ordezkari euskal film bat izatea bitxia zaizue?

AEBetako Akademiari berdin zaio bozkatu behar duen filma argentinarra, mexikarra, korearra… edo nongoa den, pelikula bera da baloratzen dena eta puntu horretan gaude orain. Oraindik luzea da Oscarretarako bidea, Hollywoodeko Akademiak aukeratu beharko gintuzke, baina lehen urrats honek balio handia du bere horretan.

Jaialdiz jaialdi ibilbide oparoa egin du Loreak filmak, Donostiako Zinemaldian iaz estreinatu zenutenetik.

Nazioartean asko mugitu da eta hori ere lagungarria da. AEBetako zine jaialdietan adibidez, oso harrera ona izan du (Palm Springsen irabazi genuen, esaterako) eta hango medioetan ere kritika onak izan ditu. Orain, are gehiago lortu nahi dugu AEBetan, han jokatuko delako partida: kritika eta harrera on gehiago nahi dugu.

Zinema aretoetan ere ikusle ugari gerturatu da pelikula ikustera.

Datu esanguratsu bat: 2014ko bosgarren film ikusiena izan da Gipuzkoan. Guztira 50.000 ikusle inguru izan ditugu Euskal Herrian eta oso pozik gaude emaitzarekin, gainera oso posible delako albiste hau dela-eta hainbat aretotan berriz programatzea.

Zein da pelikulak duen arrakastaren gakoa?

Ez dakit. Jose Marik [Goenaga] esan ohi du jendeak oso modu diferentean harrapatzen duen filma dela eta hor dagoela klabea, eta egia da denetik esan digutela: batzuei tonua gustatzen zaie, beste batzuei filmaren estiloa, edo interpretazioa nabarmentzen dute, edo sinesgarritasuna… Gauza oso ezberdinak, eta hori polita da, bakoitzak modu diferentean jasotzea. Dena den, distantzia falta zaigu oraindik, hobeto baloratzeko.

AEBetara joango zarete hautagaitza defendatzera?

Ezustean harrapatu gaitu berriak, ez dugu plangintzarik egin eta ekoizleekin hitz egin behar dugu oraindik, baina ziurrenik joango gara, bai.

Informazio gehiago:

“Metaforikoak bai, baina ez dugu kriptikoak izan nahi”

Begiekin usaintzekoak