Errefuxiatuekin “poli ona-poli gaiztora” jolasten ari da Europa

Atalak: Gizartea, Nazioartea, Politika

Europako liderrek errefuxiatuen harrerarako 100.000 plaza adostu berri dituzte Bruselan, baina mugak zorroztea eta poliziez indartzea ere hitzartu dute, agerian geratu da euren arteko zatiketa, badirudi nork errefuxiatu gutxiago hartu dela Estatuburuen kezka nagusia… eta oraindik betetzeko dituzte aurretik hartutako konpromisoak.

Solidaritatea eta ardura eskatu du Angela Merkelek, baina bere herrialdean erreforma legala egin du Alemaniako Gobernuak, kanporaketak bizkortzeko eta migratzaileei prestazioak murrizteko. Europara iristeko bide legalak erraztu behar direla dio Jean-Claude Juncker Europako Batzordeko presidenteak, baina mugetan gero eta harresi altuagoak dauzkagu. Migrazioa legeztatu behar dela adierazi du, baina horren ordez zorroztu egin dira kontrolak, errefuxiatu ez den migratzaile oro bere herrialdera lehenbailehen bidaltzeko. Mugimendu xenofoboak gogor salatzen dituzte gobernuburuek, baina errefuxiatuen artean yihadistak sartu daitezkeela edota Europaren musulmanizazioa eman daitekeela ohartarazten dute politikari burugabeek. Mugak irekitzeko agindua ematen dute gaur, eta ixtekoa bihar. Lehen mailako krisia dela eta halakoxe erantzuna emango diotela adierazi dute, baina Sirian nola ekin ez dakite oraindik, eta 87 errefuxiatu birkokatzeko gauza baino ez dira izan orain arte (arrakasta handitzat saldu dutena). Errefuxiatuekiko Europak betebehar etikoa duela diote gure agintariek, baina 400 milioi biztanleko Europar Batasunarentzat 200.000 errefuxiatu sekulako arazoa direla planteatzen dute. Diskurtso sentikorrak dituzte mugetako egoeraz, baina eskuak garbitu eta Gobernuz Kanpoko Erakundeen eta errefuxiatuentzako elkarteen gain uzten dute pertsona hauek artatzea. Europa batu eta indartsuaz mintzo zaizkigu, baina herrialde bakoitza bere politika ari da aplikatzen. Eta azken buruan, errealitatea da gobernu batzuk gordinago, besteak sotilago, apenas ari direla ezer egiten Europako mugetan pilatzen ari diren herritar desesperatuen egoera konpontzeko… negu gorria iristear dela.