Umeak lokatzetan jolastu eta zikintzea gomendatzen du zientziak ere

Atalak: Hezkuntza, Natura, Osasuna

“Zure seme-alabak egunero zikin itzultzen ez badira, behar bezala aritu ez diren seinale”, dio Mary Ruebush zientzialariak. Haurrak lokatzetan aritzearen onurak berresten ditu zientziak.

Badakigu, ikuspegi pedagogikotik, umeei mesede egiten diela aire librean aritzeak, lokatza, lurra, belarra, hostoak, makilak… eta oro har natura eta ingurua esploratzeak, jolas librearen bidez motrizitatea, sormena, autonomia, autokontrola, norberaren trebezia eta potentzialtasunak, mugak eta interesak modu naturalean garatuz.

Bada, beste arrazoi batzuk ere badaude haurrak (eta helduak) lokatzetan gustura zikintzeko, lurrarekin jolasteko edota baratzegintzaz eta lorezaintzaz gozatzeko. Lokatzetan aurkitzen den bakteriak (Mycobacterium vacae) serotonina sortzen du gure gorputzean, eta serotonina lagungarri da antsietateari eta depresioari aurre egiteko, umorea hobetzeko eta kontzentrazio eta ikasketa gaitasuna handitzeko.

“Zikintasuna ona da”

Mary Ruebush mikrobiologo eta immunologoak argi du: “Utzi umeari ume izaten. Zikintasuna ona da, umeek erantzun immuneak sortu ahal izateko. Haurra beti garbi mantendu nahi badugu, bere sistema immunologikoaren garapena kaltetzen egon gaitezke”. Garbitasunarekiko obsesioak alergiak eta beste hainbat gaixotasun areagotu dituela ere badio zientzialariak, eta gurasoentzat mezu zuzena du: “Amei bonbardatzen zaie esanez ez direla ama onak, garbitasunarekin obsesibo jokatzen ez badute, baina erlaxatu gaitezen denok. Umeek berezkoa dute inguruko germenak xurgatzeko gaitasuna”.