Zergatik hartu parte Behobia-Donostian

Atalak: Kirola

Korrikaren festa batzuentzat, negozio masifikatua besteentzat, aintzat hartu beharreko ekarpenak egiten ditu Behobia-Donostiak.

Filosofia eta maila guztietako jendea biltzen du lasterketak (Diariodenavarra.es)

– Datuek gero eta gizarte sedentarioagoa garela dioten garaiotan –Osasunaren Mundu Erakundeak zehazten duen gutxieneko jarduera fisikora ere ez da iristen EAEko biztanleen %31–, kirolera gerturatzeko eta korri egitera animatzeko akuilua da lasterketa hau: gai da 34.000 herritar korri egiten jartzeko, fokua haiengan finkatzeko, eta festa giroan ariketa fisikoa protagonista bihurtzeko.

– Masifikatuegia dagoela kexu dira korrikalari batzuk, eta egia da eredu makroa duela oinarri, baina filosofia eta maila guztietako jendea biltzeko aukera ere ematen du horrek. “Niri jendeak esan izan dit, ‘Behobian oso lasai ateratzen naiz txarra izanda, hainbeste jende ateratzen da nire abiaduran, babestuta noala’. Beste edozein proba herrikoira zoaz eta lasterketa erdian bakarrik joateko arriskua daukazu, edo erratz-autoa atzean duzula, edo pasa ahala zinta kentzen ari zaizkizu… Baina Behobian, hainbeste jende dagoenez, beti zaude korrikalariz inguratuta, bakoitzak bere karrera egiteko aukera du eta uneoro babestuta sentitzeko aukera, atentzioa eman gabe”, dio Dorleta Ugalde kirol adituak.

– Behobia-Donostia prestatzeko aitzakian, arratsaldetan edota asteburutan korri egitera ateratzen diren herritar taldeak sortu dira leku ugaritan, afizioa urte osoan zehar mantenduz. Era berean, emakumeak korrikara zaletzeko tresna izan da Behobia. Emakundek bideraturiko diru-laguntzei esker, eskualdeka emakume taldeak sortu zituzten, entrenatzaile baten gidaritzapean lasterketa prestatzeko. “Zarauzkoa da arrakastatsuena eta 80-100 emakume inguruk eman zuten izena, adin guztietakoak, inoiz korri egin gabeko 100 emakume! Gaur egun, maila guztietako emakumeak dituzte korrika eta Behobiako helburua askogatik gainditu dute, lasterketa herrikoi pila batean hartzen dute parte”, Dorleta Ugalderen arabera.

– Herri arteko errepide zati handiena edo handienetakoa hartzen duen lasterketa izango da hau ziurrenik: Irundik Donostiaraino errepidea inbaditzen dute korrikalariek, baita proba ikustera gerturatzen diren oinezko eta txirrindulariek ere, espazioa fisikoki eta bisualki berenganatuz, behingoz autoak alboratuz. Autoa jaun eta jabe izango ez den hiri eta lurralde antolamendu baten alde amesteko lasterketa ere bada Behobia-Donostia.

Informazio gehiago:

Behobia-Donostiako parte-hartzaileei galdezka.