Boligrafo berdez zuzenketa positiboak egiten hasi zen ama
Alabaren ariketak zuzentzeko, neskatoak gaizki egiten zuena gorriz borobildu ordez, ongi egiten zuena berdez nabarmentzen hasi zen Tatiana Ivanko. Emaitza onak ikusita, bere esperientzia kontatu du.
Goiko irudian duzue adibidea: eskua entrenatzeko, amak eredua eman eta berau errepikatzen saiatu da alaba. Lerro bakoitzean, ondoen daudenak berdez borobildu dizkio amak. “Berari asko gustatzen zaio. ‘Ama, zein da ongien atera zaidana?’ galdetzen dit beti. Lerroan dauden hogei borobiletatik, bakarra dago gaizki egina, zergatik emango diogu protagonismo guztia bakar horri?”.
Gaizki dagoena adierazita, akatsetan kontzentratzen gara; ongi dagoen horretan arreta ipiniz, “esperimentatzen ditugun emozioak guztiz ezberdinak dira eta jarrera ere bestelakoa da. Gure subkontzienteak joera izango du ongi egin duguna errepikatzera, barne-motibazioa ez da akatsak saihesten ahalegintzea, ondo egiten ahalegintzea baizik. Gauza bera dirudi, bana pentsamenduaren egitura beste bat da”, dio Ivankok.
Ikuspegia aldatzean dago gakoa, umetatik ohitzen baikara fokua hutsegiteetan jartzera, gaizki iruditzen zaigun hartan.
Irakurri baita ere:
Golden 5 hezkuntza programaz Estitxu Eizagirrek idatzitako erreportajea: Zure umeak ere eskolan distira egin dezan.
Eskerrik asko jatorrizko errusierazko lotura pasatzeagatik, esan ez diguzuna da jatorrizko idatziaren izenburua dela Zelan eragiten duten koaderno bateko [gorriz markatutako] akatsek [familietako] dibortzio kopuruan.
Eskerrak Googlek dena berehala itzultzen digun. Errusiera –> Euskara; Errusiera –> Ingelesa…
Goiz on!
Bittor
P.S. Bide batez esan Golden 5ko espainolek oso gauza zentzudunak esaten dituztela ikasleen trataeraz, berez oinarri zientifiko edo teoriko handirik gabeak baldin badira ere. Irakaskuntzaren esperientzia da.
Kaixo, Bittor. Eskerrik asko iruzkina uzteagatik.
Nik adar bati heldu diot (irakaskuntzaren adarrari) baina hain juxtu sakondu nahi duenarentzat utzi dut jatorrizko idatzia. Ivankok estrapolatu egiten du txikitatik positiboki irakastearen esperientzia, eta esaten du bikote harremanean ere positibotik eraiki behar dela harremana, fokua akatsetan jarri ordez.
Eta bai, oso gauza zentzudunak esaten dituzte Golden 5 egitasmoari buruz.