Ez haserretu Oscar sariekin, Hollywoodeko pelikulekin baizik

Atalak: Gizartea, Zinema

“Nola da posible, bigarren urtez jarraian Oscarra irabazteko 20 aktore hautagaiak zuriak izatea? Beltzok ez al dakigu antzezten?!”, idatzi du Spike Lee zuzendariak, eta sari banaketara ez dela joango iragarri du.

Spike Lee zuzendaria, #OscarsSoWhite ekimenaren bultzatzaileetako bat.

Beste hainbatek bat egin du aldarrikapenarekin, boikotera ere deitu du Jada Pinkett aktoreak, eta Hollywoodeko Akademiatik berehala iritsi da erantzuna: neurriak hartuko dituztela, hautagaiak –eta sarituak– erabakitzen dituzten Akademiako kideen artean aniztasuna areagotzeko, eta “genero, arraza, etnia eta sexu joera” aniztasuna aintzat hartzeko.

Arazoa, baina, sakonagoa da: egia da epaimahaikide gehien-gehienak gizonezko zuri heterosexualak diren bitartean, hautaketa irizpideetan ere ikuspegi hori gailendu daitekeela, baina Hollywoodeko zinemaren isla dira Oscarrak, eta zinema-industrian nagusi den begirada gizonezkoa, zuria eta heterosexuala den bitartean, halakoxeak izango dira protagonista gehienak, baldin eta helburua ez bada “ezohiko” eta “salbuespen” den hori azpimarratzea: alegia, gai unibertsala izan ordez, istorioaren ardatza baldin bada protagonista zuria ez beste arraza batekoa dela, edo emakumea, edo homosexuala… Eta orduan ere, begirada paternalistatik kontatuko digute auzo marjinatuan aurrera ateratzea lortu duen beltzaren istorioa edo itxuraz independente den baina sakonean ezkontzearekin amesten duen emakumearena. Gure pantailak inbaditzen dituen Mendebaldeko zinema industriarik garrantzitsuenak, eta ondorioz gure iruditerian eta mundu ikuskeran eragin izugarria duen Hollywoodek, zer nolako rola eta zein leku ematen dio bakoitzari?

Hori bai, eszenifikazioaz badaki zerbait Hollywoodek, eta polemika honetaz guztiaz hitz egitera Akademiako zuzendari Cheryl Boone atera da, beltza eta emakumea. Balio bezate Jokin Azpiazuren hitzok: “Parekidetasunaren ideia liberalak irentsi egin gaitu erabat eta identifikatu dugu berdintasuna prentsaurrekoan neska eta mutila jartzearekin, kanpora begirako ekintzetan emakumeak ikusgarritasuna izatearekin edo administrazio publikoko kuotekin. Baina ez da hainbeste dagoen hori berdintzea, dagoena eraldatzea baizik, sakonetik”.