Maitasuna kontrolarekin parekatzen duen iragarkia, jasotako kritikengatik baztertua

Atalak: Gizartea

Harreman berriak egiteko Tinder aplikazioan elkar ezagutu duten bi gazte dira iragarkiko protagonistak. Mutilak etengabe kargu hartzen dio neskari, badakiela neskak Tinder erabiltzen jarraitzen duela eta “atsegin dut” ematen diela beste mutil batzuen profilei. Azkenean, amore ematen du neskak, beste mutilen profiletan “atsegin dut” gutxiago sakatzen saiatuko dela hitz ematen dio.

Maitasuna ulertzeko modu hau, El Corte Inglés kateak San Valentin kanpainaren baitan sareratutako bost film laburretako baten trama da –maitasun istorio bana irudikatzen dute film laburrek–. Bideoak kritika zaparrada jaso du sare sozialetan, eta ondorioz, interneten ikusgai jarraitzen duen arren, kanal ofizialetatik zabaltzeari utzi zion denda-kateak.

Maitasuna kontrolarekin parekatzen duela salatu dute ikusleek, jeloskorkeria eta jabetzaren kontzeptua gailentzen direla. Arazoa da mutilaren jarrera ateratzen dela garaile eta jarrera horri esker nahi duena lortzen duela azkenean: mutilak hurbiletik zelatatzen duen arren –neskak Tinderren egiten dituen mugimendu guztiak aztertzen ditu–, galdeketa zorrotza egiten dion arren eta xantaia egiten dion arren –“nik kamisetarik gabeko argazkiak Instagramera igotzeari utzi diot zuregatik”, esaten dio mutilak une batean–, bestelako harremanei uko egiteari men egiten dio neskak, aukeratu duen mutila bera dela frogatzeko.

Hiru mutiletik batek uste du bikotekidea kontrolatzea normala dela

Iragarkiko jarrera toxikoa garaile ateratzeak nolabait txalotu eta normalizatu egiten du errealitatean zabalduta dagoen gaitza: 15 eta 29 urte arteko hiru mutiletik batek onargarritzat dauka bikotekidea kontrolatzea, 2015ean Espainiako Estatuan kaleratutako ikerketa baten arabera. Neska-lagunaren ordutegiak kontrolatzea eta mugak jartzea ondo ikusten dute, baita ere neska-lagunari galaraztea lagunak ikustea, lan egitea edo ikastea. Nesken %28k aitortu zuen bikotekideek kontrolatzen dituztela.

Maitasunetik indarkeriara

Bestalde, Medicus Mundi, Farapi eta EHUko lantalde bat 13-18 urte arteko 60 bat gazte gipuzkoarrekin aritu da urtebetez, maitasun erromantikoaren inguruan dituzten ideiak aztertzeko. Ondorioetan diotenez, “maitasun erromantikoak eragina du indarkeria matxistaren adierazpenen sorreran”. Eta maitasun erromantikoaren atzean deskribatu dituzten zortzi ideia nagusien artean, erabateko kontrola da bat.

Gaiaz gehiago:

Maitasun erromantikoaren mitoak