Oposaketak kontzertatuetako irakasleei?

Atalak: Hezkuntza

Ikastetxe kontzertatuetako irakasleei oposaketa modukoak egiteko aukeraz aritu zaigu Jose Luis Mendoza Nafarroako Hezkuntza kontseilaria: “Negoziazio batean egon daitekeen proposamena da, diru publikoa jasotzen dutela ikusarazteko”. Kontzertatuan lanean ariko balitz, hala egingo lukeela dio Mendozak, “irakasleen kontratazioetan gardentasuna frogatzeko, baina horrek ez du esan nahi kontzertatuetako kontratazioak gardenak ez direnik”.

Gai arantzatsua, inondik inora, bi hari-muturren arteko orekan oinarritua: autonomia batetik, eta gestio eta kontratazio egokia eta gardena bestetik. Oposaketek ez dute frogatzen irakasle ona edo txarra zarenik, bestelako irizpideak interesgarriagoak izan daitezke ikastetxeko hezkuntza proiektuarentzat, baina kontratazioak aliritzira egiteak diskriminazioa eta entxufismoa ahalbidetu ditzake, zentzurik txarrenean. Ikuskaritza egitea neurri eraginkorra izan daiteke, ikastetxeko kudeaketa irizpide egokien arabera egiten dela ziurtatzeko, baina non dago muga, ikuskaritza ez dadin kontrol mekanismo bilakatu? Aipatu izan den bezala irakasleak urtero azterketa egiten jartzeak edo administrazioak kontuan hartzeko ikasleek irakasleari nota ipintzeak ez dirudite oso proposamen zentzudunak.

Bestalde, diru publikoa jasotzen duten enpresa asko daude; azterketa egingo al zaie langileei? Eta sakonean, egungo oposaketen planteamendua al da langileria publikoaren egonkortasuna bideratzeko modurik aproposena? Baloreen gaineko ikuskaritza, hori egingo nieke nik funts publikoak jasotzen dituzten erakunde eta enpresei, bermatu ditzaten aukera berdintasuna, funtzio soziala, parekidetasuna, aniztasuna, baldintza duinak, gestio berdea, ekonomia justua, hizkuntza politika egokia, benetako parte-hartzea… Eta ikastetxeen kasuan, gainera, balore horiek hezkuntza proiektuaren parte izan daitezen.