Irakaskuntza, zirko mediatiko bihurtua

Atalak: Hedabideak, Hezkuntza

“Metodo berritzaileak darabiltzaten irakasleak” bilatzen ari da TVE kate espainiarra, prestatzen ari den azken reality show-arentzat. 40 irakaslek hartuko dute parte, eta 6-12 urte arteko haurrak arduratuko dira profesional horien jarduna baloratzeaz. Ustezko berrikuntza metodologikoa ikuskizun ponposo bilakatu nahi dute, eta bitartean, benetako berrikuntza metodologikoak itotzen dituzten hezkuntza politikak dira nagusi.

Ikasgeletan ahalegin berezia egiten duten irakasleak elkarrizketatzea? Batetik eta bestetik jasotako esperientzia interesgarriekin dokumental bat prestatzea? Ez, irakasleak lehian jarriko dituen reality show formatua hautatu du TVEk, Telefónica Fundazioaren laguntzaz. Poder canijo du izena eta entretenimendu hutsa –eta audientzia, jakina– beste helbururik ez duen saioa aurreikus daiteke. Ikasgeletako lana zirko bihurtu eta maisu-maistrak pailazo rolean ikusiko ditugu.

Irakaskuntza eta berrikuntza zerbait sakonagoa direla iritzi dio hezitzaile askok: telebista aurrean egin daitekeen erakustaldia baino, egunero-egunero gela eta testuinguru bakoitzaren errealitatera egokitu beharreko hartu-emana. Baina errealitatea xurgatu eta espektakuluaren galbahetik igaro ostean emaitza desitxuratua, azalekoa eta friboloa eskaintzeko abildade berezia du telebistak. César Bona ere, munduko irakaslerik onena izendatzeko bidean finalista izan zen irakasle aragoitarra, gehiegi mediatizatutako pertsonaia bihurtu dela kritikatu du hainbatek.

Ustezko berrikuntza pedagogikoa telebistan sustatu ordez, eraginkorragoa litzateke administrazioak aurrerapauso pedagogikoetarako baldintza egokiak ezarriko balitu

Espainiako telebista publikoak ustezko berrikuntza pedagogikoa sustatu beharrean, eraginkorragoa litzateke Espainiako Gobernuak berak, baita gure administrazioak ere, aurrerapauso pedagogikoetarako baldintza egokiak ezarriko balituzte, bide berrietarako zirrikitu gutxi uzten baitute egungo curriculum itxiek, pertsona eta material murrizketek, ikasle guztientzako berdina den eredu zurrunak, lege atzerakoiek, ikastetxeen ranking-ek, ebaluazio sistema zaharkitu eta memoristikoek…