Printzesa baino, neska honek nahiago du hot dog bat izan
Dantza-eskolan Printzesen Eguna antolatu zuten eta 6 urteko Ainsley estatubatuarrak erabaki zuen nahiago zuela saltxitxa-ogitartekoz mozorrotuta joan. Argazkia sare sozialetan zabaldu eta segituan ikur bilakatu da neskatoa: aniztasunaren ikur, askatasunarena, haurtzarotik ezarritako eskema zurrun eta sexistetatik ateratzen direnena.
Printzesen Eguna antolatzeak berak emango luke beste artikulu baterako, baina konbentzionalismoei aurre egin die Ainsleyk. Natural azaldu du berak: “Dantzariek soinekoak jantzi ditzakete, baina kamiseta batekin ere egin dezakete dantza, edo nahi dutenarekin. Nik beti ez dut gustuko dotore eta soinekoa jantzita dantzatzea”. Aholkua ere eman du: “Nahi duguna egin beharko genuke, besteek pentsatzen dutenaren beldur izan gabe”.
Ezberdin izatea ez baita txarra
Hot dog mozorroa eraman nahi zuela esan zuen etxean, eta ziur al zegoen galdetu zioten gurasoek, ezberdin joango zela jantzita. Ez zitzaiola axola erantzun, eta halaxe agertu zen dantza-eskolan. Hasieran, barre egin zuten ikaskideek, baina neskatoaren pertsonalitateak denak bereganatu zituen, eta zurrumurrua zabaldu ahala, ikasle zaharragoak eta beste irakasleak gelara hurbiltzen joan ziren, hot dog dantzaria ikustera.
“Bere buruarengan konfiantza handia du. Konfiantza behar da, gelara saltxitxaz jantzita etortzeko”, adierazi du irakasleak.
Mozorroarekin dantzatzen utzi ziotelako pozik dira gurasoak, eta gaineratu dute modu ona izan dela ikaskideei erakusteko ezberdina izatea ez dela txarra. Alaba izaten ari den oihartzun mediatikoa neurtzen ari dira orain: “Gogoa duelako gauza harrigarriak egiten dituen haurra izaten jarraitzea nahi dugu, eta ez arreta eta fama lortzen delako egiten dituena”.
Interneten sortu zaizkion jarraitzaileek Hot Dog Princess bataiatu dute dagoeneko.
Antzeko artikuluak:
Iruzkinik ez
Trackbacks/Pingbacks