15.000 sinaduratik gora 3.000 irakasle kaleratzearen aurka

Atalak: Hezkuntza

Irakasle talde batek Hezkuntzan murrizketa gehiagorik ez sinadura bilketa abiatu eta egun gutxira 15.000 lagunek baino gehiagok egin dute bat. Datorren ikasturtetik aurrera, EAEko irakasleek astean bi lanordu gehiago egin beharko dituzte eta horrek, diote, 3.000 lanpostu inguru galtzea ekarriko du; 6 irakasletik 1 kalera joango da. Irakasleen ordezkapenetan emango den murrizketa eta ikasle-ratioen gorakada ere salatu dute, azken buruan hezkuntza sistemaren kalitatea eta ikasleak eurak izango baitira kaltetuak.

Ordezkapenak irakasle titularrak baja eskatzen duenetik hamargarren egunera emango dira. Gela bakoitzeko ikasle kopuruari dagokionez, ratioa urtez urte handituz doala kritikatu dute, zenbait kasutan 30 ikasleko taldeak sortzera iritsiz.

Espainiako Gobernuak agindutako neurriak dira, 2012an ateratako dekretuaren bidez –Nafarroan aplikatzen da dagoeneko–. Eusko Jaurlaritzak helegitea jarri zion dekretuari, baina Espainiako Auzitegi Konstituzionalak ez du helegitea onartu. Epaia aztertzen ari dela adierazi du Jaurlaritzak.

Irakasleak, alferrak?

Neurri hauek oihartzuna izan zuten bere garaian, Esperanza Aguirrek –orduan Madrilgo presidente– irakasleek ordu gutxi sartzen zituztela eta alferrak zirela aditzera eman zuenean. Irakasleek argitu zioten eskola ematen igarotzen duten denboraz gain, euren lanak ordu gehiago dituela, eta azpimarratu zuten muina ez zela bi ordu horiek gehitzea, halako neurriekin urratsez urrats hezitzaileen lan-baldintzak eta hezkuntza publikoa suntsitzen aritzea baizik.

Jaurlaritzak ez ditzala neurriok aplikatu, sindikatu eta eragileen eskaera

Hezkuntza eragile eta sindikatuek Eusko Jaurlaritzari eskatu diote epaiari aurre egin eta murrizketa hauek ez aplikatzeko. Kontrako erabakiak “atzerapauso handia ekarriko du Euskal Eskola Publikoan egin diren inbertsioetan. Inbertsio horiei esker lortu ditugu Estatuko beste sistemekin konparatuta dugun kalitate maila ona”, gogoratu du Euskal Herriko Ikasleen Guraso Elkarteak (EHIGE). “Irakastorduak gehituz eta ordezkapenen zaintza lanak eskolako irakasleen artean egin behar izateak eskola-saioak prestatzeko edota ikasleen jarraipena egiteko apenas utziko duen denborarik”, gehitu du ELA sindikatuak.

LAB ere gogor mintzatu da, berriki egin diren oposaketak hizpide: “Zer zentzu dauka 600 plazara iristen ez den deialdi publiko batek, baldin eta 3.000 plazako murrizketa eman behar bada Espainiako Tribunal Konstituzionalaren epai bati men eta amen eginez? Prest gaude 50 irakasleko 8 irakasle gutxiago izango dituzten ikastetxeetan lan egiteko? Non gelditzen da hezkuntzaren kalitatea baldin eta ikasleak hamar egunez irakasle gabe uzten baditugu?”. Hezkuntzan beste murrizketa batzuk ere ematen ari direla salatu nahi izan dute LABetik; hala nola, 30 ikastetxetan 9 orduko laguntza kendu dutela eta ondorioz liburutegiak itxi dituztela, edota ikastetxeetako digitalizazio proiektuen laguntzak murriztu dituztela.