Komunek ez dute genero bereizketarik izango New Yorken

Atalak: Generoa

Lege berria sinatu du New Yorkeko alkateak: pertsona bakarrarentzako komunak ez dira gehiago sexuaren arabera bananduko. Edozeinek edozein komun erabili ahalko du. Emakume/gizon binarismoa apurtzeko eta genero-marka deseraikitzeko balioko dute komun neutroek.

Transexualei nahi duten komunetan sartzea galarazten dien Ipar Carolinako legea, jaio zirenean ezarri zieten sexuaren araberako komunetan sartzera behartzen dituena, polemika iturri izan da azkenaldian AEBetan. Halakoen aurrean, eta batik bat trans komunitatearengan pentsatuz hartu du erabakia New Yorkeko Udalak, denentzako “ingurune erosoagoa eta atseginagoa” lortzeko asmoz.

Binarismoak baldintzaturiko mundua

Neska/mutil emakume/gizon sailkapenak txikitatik (jaiotzetik bertatik, izena aukeratzeko dauden arazoak kontuan hartuta) baldintzatzen gaitu, bizitza guztian zehar eta bizitzako arlo guztietan. Horri aurre egiteko modua ere badira gisa honetako erabakiak. Mondragon Unibertsitateko Huhezi fakultatean adibidez, komun partekatuak eskatu zituzten ikasleek, baita lortu ere.

Haurreskola batzuetan hasi dira komun partekatuak erabiltzen, bestela sexuaren araberako banaketa umetatik bultzatzen delakoan.