“Little men”, elkartzen eta banantzen gaituenaz

Atalak: Zinema, Zinemaldia 2016

Beti elkarrekin egongo zinetela uste zenuten; halako lagunen bat izango zenuen zure bizitzaren uneren batean. Baina gizarteak, bizitzak, inguruak, etorkizunak… bide bananduetatik garamatza sarri, hain bateragarriak iruditu arren, mundu ezberdinetakoak garela gogoraraziz. Bizitza bera, bere sinpletasun eta konplexutasunean erretratatu du Ira Sachs estatubatuarrak, Little men film gomendagarrian.

Jake eta bere gurasoak Manhattanetik Brooklynera etxez aldatu dira, hil berri den aitonaren etxera. Beheko lokala ere aitonarena zen eta bertan denda bat du Tonyren ama txiletarrak. Jake eta Tony lagun handiak egingo dira segituan eta dibertsioa, kezkak eta ametsak partekatuko dituzte 13 urteko bi gazteek. Jake-ren gurasoek Tonyren amari dendaren alokairua igo behar diotela jakinarazten diotenean, ordea, okertzen hasiko dira gauzak, bi nerabeen harremana kaltetzeraino. Bere xumetasunean, handia da Little men, maisuki eraikitako bi mutil protagonistengatik, arteaz eta jateko beharraz mintzo zaigulako, klase banaketaren arrakalez eta status quoa mantentzen duten egiturez, laguntasunaz eta familiaz, aukerez eta aukera galduez. Elkartzen eta banantzen gaituenaz ari da zuzendari estatubatuarra.

Sundancen saritua, errealitate printzak, gogoetarako zantzuak uzten dituen istorioa da Little men. Zintzoa, garbia, azukrerik gabe.

PERLAK

Little men

Zuzendaria: Ira Sachs.

Gidoilariak: Ira Sachs, Mauricio Zacharias.

Aktoreak: Theo Taplitz, Michael Barbieri, Greg Kinnear, Jennifer Ehle, Paulina García.

AEB, 85 minutu.