“Neruda”, konprometitua, poetikoa

Atalak: Zinema, Zinemaldia 2016

Alderdi Komunistako senataria eta poeta famatua izan zen Pablo Neruda, herritarrekin konprometitua. Eta halakoxea da Pablo Larrain txiletarraren Neruda filma, konprometitua eta poetikoa. Pertsonaia idealizatzetik urrun, Neruda lurtarrena ikusiko dugu, bere kontraesan guztiekin, baina haren poesiaren magia dario pelikulari.

1947-1949 urteetara garamatza Larrainek, Videla presidente txiletarrak komunistak eta zehazki Nobel sariduna preso hartzeko agindu zuen garaira. Nerudak erbestera egin zuen ihes azkenean, zaldi gainean gurutzatu zuen Txile eta Argentina arteko muga. Pertsonaia zizelkatzeaz eta garai hartako errealitate politiko eta soziala islatzeaz gain, biopic edo film biografikoen ohiko arauetatik aldendu eta istorio bitxia, originala sortu du zuzendariak: poliziaren pertsonaia asmatu eta errealitatearekin eta fikzioarekin jolastu du, espazioekin eta narrazioarekin jolastu du, generoen uztarketarekin jolastu du… Ederra da emaitza, irudietan, gidoian, kontatzeko moduan. Picasso, Pinochet, Jara ezagutuko ditugu, Luis Gnecco aktoreak maisuki antzezturiko Pablo Nerudarekin –eta Gael García Bernalek hezurmamituriko poliziaren pertsonaiarekin– gozatuko dugu eta poetaren unibertsoak harrapatuko gaitu, ezinbestean.

Pablo Larrainek ondo ezagutzen du Donostiako Zinemaldia. Txileko beste momentu historiko bat kontatzen duen No pelikula bikaina ekarri zuen 2012an eta El Club filmean elizgizonek adin txikikoei egindako gehiegikeria sexualez mintzatu zitzaigun iaz. Aurten, Neruda lanaz gain, Jackie ere errodatu du. Dudarik gabe, Txileko zine-zuzendari entzutetsu eta gomendagarrienetakoa da uneotan.

PERLAK

Neruda

Zuzendaria: Pablo Larrain.

Gidoilaria: Guillermo Calderón.

Aktoreak: Luis Gnecco, Gael García Bernal, Mercedes Morán, Pablo Derqui, Michael Silva, Jaime Vadell, Alfredo Castro, Emilio Gutiérrez Caba.

Txile-Frantzia-Argentina-Espainia, 108 minutu.