Koldo Almandoz: “Egiten gehien dibertitu naizen filma da hau”

Atalak: Zinema, Zinemaldia 2016

“Dibertigarria izan da, oso lan askea”. Hala aitortu digu Koldo Almandoz zuzendariak, Sipo Phantasma filmaren emanaldi osteko solasaldian. “Dokumentazioa bilatzen, istorio berriak azaldu ahala txertatzen… Orain arte egin ditudan lanen artean, hau da entretenigarriena, egiten gehien dibertitu naizena. Gero, muntaketa izan da zailena, material hori guztia muntatzea; gidoia ere fase horretan osatu da. Ez daukat sentsazioa luzemetraia egin dudanik, industriaren eskemetan ere ez da hala; kruzeroei buruzko dokumental bat izateko asmoz jaio zen, hasieran labur bat izango zen eta azkenean 69 minutu ditu, baina 50 izan zitzakeen, edo 90; materiala gehitu ahala, idazten joan da pelikula bera, eta niretzat dibertigarriena litzateke proiektuarekin jarraitzea, bizitza guztian, gauzak azaldu ahala filma osatzen segitzea, beti dagoelako material berria, baina une batean bukatu behar da”. Proiektu pertsonala izan arren, jende askok parte hartu duela gaineratu du.

Koldo Almandozen zigilu nabarmena daraman ordubete pasatxoko bitxikeria original honetan, Bram Stoker, haren Drakula pertsonaia eta metazinema dira protagonistak, barkua bidelagun. Off ahotsa eta musika erabiliz eta formatu eta molde ezberdinak uztartuz, emaitza ederra lortu du jaialdietara ohituta dagoen zinegileak.

Euskarazkoa adostu, eta gaztelaniazko bertsioa eman dute

Bestalde, gaztelaniaz ikusi dugu filma, ingelesezko azpitituluekin, eta horren harira oharra egin nahi izan du Almandozek: emanaldi guztietan euskarazko kopia eskainiko zela adostu zuen Zinemaldiarekin.

ZABALTEGI

Sipo Phantasma

Zuzendari eta gidoilaria: Koldo Almandoz.

Aktoreak: Maider Intxauspe, Itsaso Azkarate, Karlos Odriozola.

Euskal Herria, 69 minutu.

Sipo Phantasma filmeko fotograma.