“Arrival”. Pseudotranszendental jartzen garenean, akabo

Atalak: Zinema, Zinemaldia 2016

Zientzia fikziozko istorioa izateak ez du esan nahi sinesgarria izan behar ez duenik, eta Denis Villeneuveren Arrival pseudozientifiko, pseudofantastiko, pseudotranszendentala bere burua serioegi hartzen duen eta inolaz ere sostengatzen ez den filma iruditu zaigu.

Unibertsoaren, espazioaren eta denboraren legeak auzitan jarri eta planteatzen duen buruhausteak ikus-entzulea harritzea helburu duen film horietakoa da, baina pixkanaka hartzen duen bideak ez du ez hanka ez bururik. Abiapuntu interesgarria du pelikulak: ohiko estetikatik urruntzen diren hamabi espaziontzi estralurtar agertu dira munduan barreiatuta eta ohiko estetikatik urruntzen diren estralurtarrekin komunikatzeko Louise hizkuntzalariaren laguntza eskatuko dute. Une batetik aurrera, ordea, planteamendu originala egin nahian, istorio intimista eta aldi berean transzendentala kontatu asmoz, eta puzzlearen piezak bat egin dezaten gidoia nabarmen fortzatuz, trama eskuetatik joan zaio Villeneuveri.

Hori gutxi ez, eta geopolitikaren ikuspegi oso yankia ematen du filmak: estralurtarrekin eztabaidatzeko prest daude estatubatuarrak, txinatar belizistak aldiz erasorako pronto, eta Txinak egiten duena txintik esan gabe jarraitzen dute errusiarrek. Onena, Amy Adams aktore protagonista, hizkuntzalari adituaren rolean.

PERLAK

Arrival

Zuzendaria: Denis Villeneuve.

Gidoilaria: Eric Heissever.

Aktoreak: Amy Adams, Jeremy Renner, Forest Whitaker.

AEB, 116 minutu.