Errefuxiatu bat Alemanian ezkutuan sartu zuelako espetxeratu nahi dute

Atalak: Errefuxiatuak, Migrazioa

Abuztuan, Italian oporretan zegoela, ezagun baten eskaria jaso zuen Diether Dehm alemaniarrak: ama galdu eta gerratik ihes egin zuen 20 urte baino gutxiagoko afrikarra (datu gehiago ez dute eman nahi izan, badaezpada) eramango al zuen autoan ezkutaturik Alemaniara, han bizi den aitarekin elkartu zedin. Laguntzea erabaki zuen Dehmek, baita helburua lortu ere, baina nahi gabe azaleratu egin da sekretua eta zigortu egin nahi du fiskalak; poliziak ere espetxea eskatu du herritar altruistarentzat.

Pertsonaia publikoa da Dehm, Alemaniako Die Linke alderdi ezkertiarreko parlamentaria. Autoko maletegian gordeta eraman zuen iheslaria eta ez da damutzen: “Galtzak eta kamiseta bat, besterik ez zuen mutilak, eta denbora asko zeraman lorik egin gabe; Italian egun batzuez nire etxean hartu nuenean, 20 ordu egin zituen lo segidan”. Jaten ere eman zion eta Alemaniaraino eraman zuen ondoren.

Sare sozialen eta kazetari baten erruz, epaitegietara

Politikariak sekretupean mantendu zuen ekintza, baina errefuxiatuari laguntzeko eskatu ziotenek eskerrak eman zizkioten Facebooken eta mezua ezabatu baino lehen, kazetari alemaniar batek irudia kapturatu eta publiko egin zuen –kazetariaren jokabideak beste artikulu baterako emango luke–. Orain, parlamentari izateagatik Dehmek duen immunitatea bertan behera uzteko ahaleginetan dabil fiskala, ekintza ilegalak zigorra merezi duela iritzita. Polizien sindikatua ere gogor mintzatu da: “Sistema legala mespretxatzea” egotzi diote eta “hamar urtera arteko espetxea” eskatu dute. “Ekintza hauek ez dituzte errefuxiatuak laguntzen”, gaineratu du polizia alemaniarrak.

“Nahiago dut legea desobeditu, jendea sufritzen utzi baino”

Garbi du parlamentariak: “Bakean nago nire buruarekin. Kontzientzia garbi daukat eta nahiago dut legea desobeditu, jendea sufritzen utzi baino”. Kritikoa da Merkelen Gobernuak errefuxiatuekiko daraman politikarekin: “Politika hipokrita da, batetik errefuxiatuak hartzeko mugarik ez delako jartzen, baina bestetik bitarteko eta baliabideetan mugak jartzen direlako, harrera hori ezinezko eginez. Deportazio sistema sendotzeko Merkelek egin dituen azken bi erreformen bidez, errefuxiatuak Alemaniara ez etortzeko ahal den guztia egin duela esan daiteke”.