Piercingak, bizar luzea, orraztu gabeko ilea… debekatu dituzte TVEn

Atalak: Diskriminazioa, Hedabideak

TVEren zuzendaritzatik eskutitza bidali dute ordezkaritza guztietara: “Ikusten dugu albistegietan zuzenean sartzen diren hainbat berri-emailek ez dutela euren irudia zaintzen”, diote, eta “sinesgarritasuna” argudio hartuta, honakoak debekatu dituzte: “Kamisetak, piercingak ezpainetan edo sudurrean, bizar luzeegiak edo zaindu gabeak, orraztu gabeko ilea, forma edo kolore deigarriak dituzten jantziak”, ulertzen dutelako horiek ez datozela bat “gure audientziak merezi duen errespetuarekin”. Berehala erantzun dute langileek.

Estetika jakin bat inposatzeaz gain, ondorio larriekin mehatxatu du zuzendaritzak: “Arau hauek errespetatzen ez dituzten informatzaileek ezingo dute inolaz ere parte hartu albistegietan eta 24 orduko kanalean”. TVEren estilo liburua hartu dute aitzakia, estetika zaindua aipatzen baita bertan.

Begiratu gutxiago estetikari… eta gehiago manipulazioari

Langileek erantzun dute estilo liburuak honakoa ere esaten duela: herritarrek “informazio egiazkoa eta independentea jasotzeko eskubidea” bermatu behar du Espainiako telebista publikoak, eta zaindu gabeko estetika baino gehiago, “zaindu gabeko testuak ikusten ditugu guk, albistegietan, RNE irrati-kateko buletinetan eta webgunean”. Berrietan ematen den manipulazioa (hemen adibide batzuk) eta telebista katearen praktika txarrak kritikatu dituzte. Horri gehiago erreparatu diezaiotela eskatu diote zuzendaritzari, “kazetariak bizarra edo kamiseta daraman begiratu ordez”. Esaterako, Mosulera berri-emailerik ez bidali izana salatu dute, langileek hala eskatu arren.